Almatyda qurylys halyqtyń tyǵyzdyǵyn eskere otyryp júrgiziledi

ALMATY. QazAqparat- Almatynyń tarıhı ortalyǵynda gektaryna 300 adamnan keledi. Bul týraly óńirlik kommýnıkatsııalar qyzmetinde ótken brıfıng barysynda qala ákiminiń orynbasary Muhıt Ázirbaev málim etti, dep habarlaıdy QazAqparat tilshisi.

Onyń aıtýynsha, Almatydaǵy qurylys halyqtyń tyǵyzdyǵyn eskere otyryp júrgiziledi. Qalanyń tarıhı ortalyǵynda gektaryna 300 adamnan keledi.

Bul qalanyń sáýlet kelbetin qalyptastyrý jáne qala qurylysyn josparlaý erejeleri boıynsha eseptelgen.

Basqa aýdandarda «Almaty – shetsiz qala» tujyrymdamasyna sáıkes, tyǵyzdyq gektaryna 440 adamnan aspaýy kerek.

Bul tarmaq qala qurylysy qujatynda da jazylǵan.

«Aýdanda balabaqshalar, mektepter, emhanalar men polıtsııa pýnktteriniń sany jetkilikti bolǵan jaǵdaıda tyǵyzdyqty 20%-ǵa arttyrýǵa jol beriledi, ıaǵnı áleýmettik ınfraqurylym qamtamasyz etilgen», - dep atap ótti Muhıt Ázirbaev.

Erejeni Almaty qalalyq máslıhaty 2021 jylǵy 31 mamyrda qabyldady jáne qurylys salýshylar úshin negizgi qujatqa aınaldy.

«Talaptar jıyntyǵy qala qurylysy salasyn jetildirýge jáne jaqsartýǵa múmkindik beredi, ıaǵnı jaıly, estetıkalyq tartymdy qalalyq ortany damytady. Qaǵıdalarda qala turǵyndary men qurylys salýshylardyń múddeleri arasyndaǵy tepe-teńdik saqtalǵanyn atap ótken jón»,- deıdi ol.

Sonymen qatar, ol qaǵıdalar Almaty qalasynyń ákimi Baqytjan Saǵyntaevtyń tapsyrmasy boıynsha ázirlengenin eske saldy.

«Al qujatty jasaýdyń alǵysharty 2019 jylǵy 28 jeltoqsanda Memleket basshysy Qasym-Jomart Toqaev qol qoıǵan «Almaty qalasynyń erekshe mártebesi týraly»; «Jergilikti memlekettik basqarý jáne ózin-ózi basqarý týraly»; «Sáýlet, qala qurylysy jáne qurylys qyzmeti týraly» zańdarǵa ózgerister men tolyqtyrýlar engizýdi kózdeıtin QR Zańy boldy»,- deıdi ol.