Almatyda kúrdeli jóndeýden keıin 315 oryndy balabaqsha ashyldy

ALMATY. QazAqparat- Almaty ákimi Baqytjan Saǵyntaev Áýezov aýdanyndaǵy seısmıkalyq kúsheıtý jáne kúrdeli jóndeý júrgizilgen balabaqsha ǵımaratyn aralap kórdi, dep habarlaıdy QazAqparat tilshisi.

№186 bóbekjaı-balabaqsha Áýezov aýdanynyń «Aqsaı-4» shaǵyn aýdanynda ornalasqan. Ǵımarattyń jalpy alańy – 4343 sharshy metr. 315 oryndy balabaqshada seısmıkalyq kúsheıtý, qalpyna keltirý jumystary jáne ǵımaratqa kúrdeli jóndeý jumystary júrgizildi.

Baqytjan Saǵyntaev atalǵan balabaqshanyń ashylýy buryn jalǵa berilgen memlekettik balabaqshalardyń ǵımarattaryn qaıtarý jónindegi qalalyq baǵdarlamanyń nátıjesinde múmkin bolǵanyn atap ótti.

Eske salsaq, aǵymdaǵy jyly 360 oryndy úsh memlekettik balabaqshanyń qurylysy aıaqtaldy. 280 oryndy taǵy bir balabaqshanyń qurylysy jalǵasýda, paıdalanýǵa berý 2022 jylǵa josparlanǵan.

Sonymen qatar, 4658 oryndy 72 jekemenshik balabaqsha ashyldy. Memlekettik bilim berý tapsyrysy 30 460 oryndy 519 jekemenshik balabaqshada ornalasqan. Jyl sońyna deıin 250 oryndy taǵy bes jekemenshik mektepke deıingi uıym ashý josparlda.

Qazirgi kezde qalada 1 jastan 6 jasqa deıingi balalardyń 64,2%-y, 3 jastan 6 jasqa deıingi balalardyń 90,6%-y mektepke deıingi tárbıemen qamtylǵan.