Almatyda kúnniń qatty ysýyna baılanysty eskertý jasaldy
Almaty qalalyq tótenshe jaǵdaılar departamenti Qazgıdromettiń 26 shildedegi daýyldy eskertýi negizinde Almatyda 27 shilde kúni aýa raıy 37-39 gradýsqa jetip, 28 shildede qatty jańbyr, naızaǵaı, burshaq kútiletinin habarlaıdy. Osyǵan oraı TJD eskertý jarııalady.
«Batys jaqtan soǵatyn qatty jel ekpini sekýndyna 18 -23 metrge jetedi. Qatty jel kezinde avtokólikti aǵashtardyń, elektr jelileri men basqa da álsiz bekitilgen qurylymdardyń astynda qaldyrmaýdy suraımyz. Taýǵa demalýǵa barǵanda ashyq ot jaqpaýdy, tutanǵan temeki qaldyqtaryn tastamaýdy suraımyz. Bir jelige birneshe elektr qurylǵysyn qospańyz. Sebebi elektr jelisiniń shamadan tys júktelýi qysqa tuıyqtalýǵa jáne órtke ákelýi múmkin.
Balalardy avtokólikterdiń ishine az ýaqytqa bolsa da qaldyrmańyz. Qala turǵyndary men qonaqtaryn kún sáýlesiniń áserinen saqtaný úshin serýenge shyqpaýǵa shaqyramyz»,- dep eskertti Almaty qalalyq TJD.