Almatyda kúnine 200-den astam stýdent vaktsına saldyrady – Bekshın

ALMATY. QazAqparat - Almaty qalasynyń bas memlekettik sanıtar dárigeri Jandarbek Bekshın onlaın brıfıng barysynda megapolıste stýdentterge vaktsına salý jalǵasyp jatqanyn aıtty, dep habarlaıdy QazAqparat tilshisi.

«Kóptegen stýdent belsendi túrde vaktsına alýdy oqý jyly bastalmaı turyp-aq bastap ketti. Mysaly, maýsym aıynda birinshi komponentin 4 676 adam, shildede 7 872 stýdent, tamyzda 4 733 adam saldyrdy. Kún saıyn 200-den astam stýdent vaktsına alady»,- deıdi ol.

Sonymen qatar, ol stýdentter vaktsına alý arqyly ózderin ǵana emes, jaqyndaryn qaýipti aýrýdan qorǵaıtyndaryn jaqsy túsinetinin atap ótti.

«Stýdentter men ekpe saldyrýǵa tilek bildirýshi turǵyndar Almatydaǵy 160 ekpe ortalyǵynyń birine júgine alady», - deıdi Jandarbek Bekshın.

Spıker jaqyn arada Almaty emhanalarynda tumaýǵa qarsy vaktsınalaý bastalatynyn aıtty. Qazirgi ýaqytta reseılik «Grıppol+» vaktsınasynyń 180 myń dozasyn satyp alýǵa ótinim berildi.