Almatyda kún saıyn 7,5 myń kireberis pen 1,5 myń aýla dezınfektsııalanady
10:48, 13 Maýsym 2020
ALMATY. QazAqparat - Almatyda kúnine 7,5 myń kireberis pen 1,5 myń aýla dezınfektsııalanady. Bul jaıynda shahar basshysy Baqytjan Saǵyntaev Instagram paraqshasynda jazdy, dep habarlaıdy QazAqparat.
«Koronavırýstyń taralýyn tejeý maqsatynda qalada barlyq jaǵdaı jasalyp otyr. Sonyń biri — qoǵamdyq keńistikti dezınfektsııalaý. Kósheler, saýda jáne qyzmet kórsetý nysandary, medıtsınalyq mekeme aýmaqtary, jaıaý júrginshiler joly, jalpy juqtyrý qaýpine ıe barlyq zattar zalalsyzdandyrylýda. Sonymen qatar, kún saıyn 7,5 myń kireberis pen 1,5 myń aýla, sonyń ishinde balalardyń oıyn jáne sport alańdary dezınfektsııalanady. Buǵan 75,4 myń lıtr eritindi jumsalady» dep jazady qala ákimi.
Onyń aıtýynsha, bul jumysty 450 dezınfektsııalyq kompanııa atqaryp júr.
«Bolat Ospanov syndy qarapaıym jigitter COVID-19 taralýyna qarsy is-qımylda belsendilik tanytyp júr. Biz de jaýapkershilik tanytaıyq» dep atap ótti Baqytjan Saǵyntaev.