Almatyda kún 37 gradýsqa deıin ysıdy
Almaty qalalyq TJD málimetinshe, Qazgıdromet usynǵan málimetke sáıkes 7-9 maýsym kúnderi Almatyda aýa temperatýrasy 35-37 gradýsqa deıin kóteriledi.
Osyǵan baılanysty Almaty qalasy TJD qala turǵyndary men qonaqtaryn kún astynda kóp serýendemeýge shaqyrdy.
«Kún sáýlesi tikeleı túsetin jerlerge barmańyz. Saǵat 12:00-den 16:00-ge deıin kún qatty ysıdy. Deneni kún sáýlesinen qorǵap, jabyq kıim kııýge tyrysyńyz jáne kúnnen qorǵaıtyn krem jaǵyńyz» dep eskertedi mamandar.
Sonymen qatar:
- Alkogoldi ishimdik ishpeńiz – alkogol ystyqta aǵzaǵa tez áser etedi;
- Suıyqtyqty (salqyn sý, mıneraldy sý) múmkindiginshe kóp ishýge tyrysyńyz;
- Dene shynyqtyrýmen aınalyspańyz. Qatty júkteme ystyqta jylý almasýdy arttyrady da aǵzany sýsyzdanýǵa ákelip soqtyrady;
- Avtokólikpen uzaq saparǵa shyqpańyz, eger bul múmkin bolmasa, jolda múmkindiginshe abaı bolyńyz, sebebi aptap ystyqtan adam ózin ózi nashar sezinýi múmkin jáne reaktsııa tómendeıdi
- Balalardy avtokóliktiń ishinde az ýaqytqa bolsa da qaldyrmańyz. Qatty ystyqta bala esinen tanyp qalýy múmkin.