Almatyda kreatıvti ındýstrııa salasyndaǵy bıznes 5,4 mlrd teńge salyq tólegen

ALMATY. QazAqparat – Almatyda kreatıvti ındýstrııa salasynda 27 myń 200 myń kásiporyn tirkelgen. Onyń tek 22 myńy jumys istep tur. Bul týraly Almaty qalasy ákiminiń orynbasary Álisher Ábdiqadyrov Almatyda І Kreatıvti ındýstrııalar aptalyǵy aıasynda uıymdastyrylǵan plenarlyq sessııada aıtty, dep habarlaıdy QazAqparat tilshisi.

Spıkerdiń aıtýynsha, Almatyda sońǵy jyldary aqparattyq júıelerdi jobalaý, baǵdarlamalyq qamtamasyz etý, veb-portaldardy ázirleý, mýzyka, kınoındýstrııa, jarnama, marketıng, bilim berý jáne mádenıet salasyndaǵy qyzmetter sany ósip keledi.

«2021 jyly kreatıvti ındýstrııa salasyndaǵy bıznes sýbektileri 5,4 mlrd teńge salyq tóledi. Bul 2020 jylmen salystyrǵanda 5% ósim kórsetti. Jumys istep turǵan eń kóp kásiporyn Bostandyq (5862 sýbekt), Almaly (5214), Medeý (3845) aýdandarynda, eń azy Alataý (1138) jáne Naýryzbaı (773) aýdandarynda baıqaldy»,- dedi Álisher Ábdiqadyrov.

Kreatıvti kásipkerlerge júrgizilgen saýalnama boıynsha Almatyda kreatıvti ındýstrııanyń damýyna kedergi keltirip otyrǵan birqatar máseleler anyqtaldy.

«Almatyda kreatıvti kásipkerlerdiń 85%-y ınfraqurylymǵa muqtaj, 56%-y bıznesti júrgizý quzyretiniń deńgeıi tómen ekenin aıtty, 31%-ǵa qarjylandyrý jetispeıdi, 10%-y bilikti kadrlardyń tapshylyǵyn aıtty. Bul máseleler kreatıvti ındýstrııany damytý úshin ınfraqurylymdy qalyptastyrý, kreatıvti ındýstrııaǵa kásipkerlikti yntalandyrý, kreatıvti ındýstrııany damytý úshin bilim, tájirıbe men quzyretterdi qalyptastyrý, ony taratý jolymen sheshiledi»,- dedi Almaty qalasy ákiminiń orynbasary Álisher Ábdiqadyrov.

Eske salaıyq, Almatyda І Kreatıvti ındýstrııalar aptalyǵy bastaldy. Ol 1-5 qarasha aralyǵynda ótedi.

Sharaǵa bilim berý jáne kreatıvti habtar, Qazaqstan, Reseı, Belarýs, Qyrǵyzstan, Ózbekstan, Gollandııa, Italııa, Ulybrıtanııa elderiniń kreatıvti segment uıymdary qatysady.