Almatyda kreatıvti ındýstrııa basqarmasy qurylady

ALMATY. QazAqparat - Almaty qalasy máslıhatynyń VII shaqyrylymynyń kezekten tys II sessııasy ótti, dep habarlaıdy QazAqparat tilshisi.

Sessııa barysynda máslıhat depýtattary Almaty qalasynyń ákimi Baqytjan Saǵyntaevtyń «Almaty qalasynyń kreatıvti ındýstrııalar basqarmasy» kommýnaldyq memlekettik mekemesin qurý týraly bastamasyn qoldady.

Aıta ketý kerek, «Almaty-2050» damý strategııasyna sáıkes qala ekonomıkasynda kreatıvti ekonomıkany damytý baǵytynda qurylymdyq manevrdi júzege asyrý josparlanǵan.

Megapolıs únemi oılaý qabileti ushqyr, kreatıvti, talantty jáne biregeı adamdardy biriktiredi, al zamanaýı tsıfrlyq quraldar ósý dınamıkasyn arttyratyny atap ótildi.

Osy maqsatta kretıvti ındýstrııany damytý strategııasy qabyldandy.

Sonymen birge, kreatıvti segment qalyptasýy úshin memlekettiń ıntegratıvti qoldaýy qajet, onyń mindetterine jumysty saýatty úılestirý, jan-jaqty járdemdesý jáne áleýetti júıeli damytý kiredi.

Kreatıvti ındýstrııa - ekonomıkany damytýdyń neǵurlym perspektıvaly baǵyttarynyń biri, iri qalalardy álemdik qoǵamdastyq úshin erekshe tartymdy etetin olardyń qozǵaýshy kúshi.

Búkil álemde kreatıvti ındýstrııalar áleýeti ónerkásiptik saıasattyń ajyramas bóligine aınalýda.

Bul erekshe salalar Ulybrıtanııa, Qytaı, Japonııa, Ońtústik Koreıa, Reseıde jáne basqa da kóptegen elderde memlekettik qoldaýǵa ıe.