Almatyda QR Memlekettik hatshysynyń tóraǵalyǵymen Ádebıet jáne óner salasyndaǵy QR Memlekettik syılyǵyn berý jónindegi komıssııanyń otyrysy ótti
«Otandyq mádenıet jan-jaqty damyp kele jatyr. Elbasy bul salaǵa árqashan qoldaý kórsetýde. Ádebıet pen óner salasyndaǵy Memlekettik syılyq osyǵan dálel. Bıyl komıssııa qaraýyna kóptegen týyndy tústi. Konkýrsqa qatysýshylar elge tanymal adamdar. Biraq, memlekettik syılyq úsh atalymda beriledi. Sondyqtan, komıssııa úzdik eńbekti tańdaýy qajet. Tańdaý barysynda táýelsizdikti jáne el damýyn nasıhattaıtyn eńbekterge nazar aýdarylýy kerek. Bul - bárimizge úlken jaýapkershilik. Otyrysta shyǵarmalardy jan-jaqty talqylap, ádil baǵasyn bereıik», - dedi QR Memlekettik hatshysy Ádilbek Jaqsybekov.
Otyrys barysynda komıssııa múshelerine 2014 jylǵy ádebıet pen óner salasyndaǵy QR Memlekettik syılyǵyn alý úshin usynylǵan jumystar, olardyń tirkelýi, qaralýy jáne alǵashqy saraptamadan ótýi týraly aqparat berildi.
Budan keıin eńbekterdi talqylaý jáne jasyryn daýys berý protsesi 3 sektsııada: Ádebıet, mýzyka, teatr jáne kıno, Beıneleý óneri jáne sáýlet sektsııalarynda jalǵasty.
Sektsııalarda jalǵasqan talqylaýlardyń, jasyryn daýys berýlerdiń, odan keıingi jalpy otyrystyń qorytyndysy boıynsha baıqaýdyń kelesi kezeńine jiberiletin shyǵarmalar týraly sheshim qabyldanady.
«Memlekettik syılyq ádebıet pen óner salasyndaǵy novatorlyq eńbekterdiń qataryna jatqyzylǵan, qoǵam tarapynan moıyndalǵan, halyqtyń mádenıe-rýhanı murasyna aınalǵan týyndylar úshin berilýi tıis. Memlekettik syılyq jaıly sheshim Prezıdenttiń Jarlyǵymen bekitiletin bolady. Syılyqty Prezıdenttiń ózi tabystaıtyn bolady. Bul laýreattarǵa degen qurmettiń belgisi», - dep atap ótti Á.Jaqsybekov.
Qalyptasqan erejege saı irikteýden ótip, kelesi kezeńge joldama alǵan jumystar tizimi qoǵamda keńinen talqylaný úshin «Egemen Qazaqstan» jáne «Kazahstanskaıa pravda» gazetterinde jarııalanatyn bolady.