Almatyda kóterme saýda dúńgirshekteri otqa orandy

NUR-SULTAN. QazAqparat – Almatylyq órt sóndirýshiler 25 mınýttyń ishinde saýda dúńgirshekterinen shyqqan órttiń aldyn alyp, qyzyl jalynnyń odan ary taralýyna jol bermedi, dep habarlaıdy QazAqparat tilshisi.

Almaty qalalyq tótenshe jaǵdaılar departamentiniń málimetinshe, búgin saǵat 15:42-de Almaty aýdanynda, Raıymbek kóshesi boıyndaǵy 212/2 mekenjaıynda órt bolyp jatqany týraly habarlama túsken.

«Saǵat 15:49-da órt sóndirýshiler oqıǵa ornyna jetken kezde birqabatty saýda dúńgirshekteri men ashananyń órtenip jatqany anyqtaldy. Órttiń eki qabatty «Sabyrjan» dúkenine taralý qaýpi boldy. Oqıǵa ornynda órtti sóndirýdiń eki oshaǵy belgilenip, otty sóndirý úshin irkilissiz sý jetkizý qamtamasyz etildi. Qabyldanǵan sharalardyń arqasynda saǵat 16:16-da órttiń beti qaıtyp, saǵat 16:31-de, ıaǵnı 25 mınýttyń ishinde sóndirildi», - dep atap ótedi departamentten.

Buǵan deıin Almatyda «Saýdakent» bazarynan órt shyqqanyn habarlaǵan edik.