Almatyda kósheden tabylǵan úı-jaıy joq 15 bala arnaıy ortalyqqa jaıǵasty
Qalalyq polıtsııa departamentiniń málimetinshe, Almatyda 13-18 maýsym aralyǵynda «Túngi qaladaǵy balalar» atty reıd ótken.
«Reıdtiń 5 kúninde ishki ister organdaryna ártúrli sebeppen 282 jasóspirim jetkizildi. Onyń ishinde 161-i - ákimshilik quqyq buzýshylyq jasaǵany úshin, 35 bala - qaraýsyz jáne panasyz qalǵany úshin. Qıyn ómirlik jaǵdaıdaǵy balalarǵa qoldaý kórsetý ortalyǵyna qaraýsyz qalǵan 15 bala ornalastyryldy», - dedi Almaty qalalyq PD jergilikti polıtsııa qyzmeti basqarmasy bastyǵynyń orynbasary, polıtsııa podpolkovnıgi Erjan Uzabaev.
Sonymen qatar, 8 jasóspirim men 11 turmysy nashar otbasy anyqtalyp, esepke alyndy.
«Kámeletke tolmaǵan balalary túngi ýaqytta oıyn-saýyq oryndarynda jáne kóshede júrgeni úshin 197 ata-ana ákimshilik jaýapkershilikke tartyldy. Túngi ýaqytta jalǵyz júrgen balalardy oıyn-saýyq mekemesine kirgizgen 6 kásipker jazalandy. Sondaı-aq, kámeletke tolmaǵandarǵa alkogol jáne temeki satýdyń 8 deregi anyqtaldy», - dep qorytyndylady podpolkovnık Uzabaev.