Almatyda koronavırýstan keıingi ońaltýǵa 178 mln teńge bólindi

ALMATY. QazAqparat- Bıyl Almaty qalasy boıynsha kovıdke shaldyqqan turǵyndardy medıtsınalyq ońaltýdan ótkizýge 178,3 mln teńge qarastyrylǵan. Bul týraly Medıtsınalyq saqtandyrý qorynyń Almaty fılıaly málim etti, dep habarlaıdy QazAqparat tilshisi.

Fılıal dırektory Tileýhan Ábildaevtyń aıtýynsha, búgingi kúnge deıin medıtsına uıymdarymen 85,5 mln teńgeniń kelisimsharty bekitilgen. Bul somaǵa 2584 postkovıdtik reabılıtatsııa qyzmeti kórsetilýi tıis.

«Koronavırýspen jáne pnevmonııanyń ortasha nemese aýyr túrlerimen aýyrǵan almatylyqtardyń reabılıtatsııadan ótýge múmkindigi bar. Olar postkovıdtik ońaltýdan kúndizgi jáne táýlikboıǵy statsıonarlarda óte alady», - dedi Tileýhan Ábildaev.

Medıtsınalyq kómekti paıdalaný úshin tirkelgen emhanadaǵy ýchaskelik dárigerden reabılıtolog mamanǵa joldama alý qajet. Dárigerler syrqattyń jaǵdaıyna qaraı densaýlyqty qalpyna keltirý josparyn jasap, emdeý kýrsynyń merzimin bekitedi.

Biraq medıtsınalyq reabılıtatsııadan ótý úshin patsıent mindetti túrde saqtandyrylǵan bolýy shart.

Sonymen qatar, Qor postkovıdtik ońaltý qyzmetin kórsetetin klınıkalar sanyn arttyrýǵa kúsh salyp jatyr.

«MSQ reabılıtatsııa qyzmetin kórsetetin klınıkalar sanyn arttyrýǵa, bul salaǵa jeke menshik klınıkalardy tartý baǵytynda jumys júrgizip keledi. Aımaqtyq komıssııa atalǵan qyzmet túrine turaqty konkýrs jarııalap otyrady», - dedi spıker.

Eske salaıyq, ótken jyly Almaty qalasy boıynsha postkovıdtik ońaltýǵa 222,4 mln teńge jumsalǵan bolatyn.