Almatyda koronavırýspen aýyrǵan oqýshylardyń 94 paıyzy indetti otbasynda juqtyrǵan

ALMATY. QazAqparat - Qazir jiti respıratorlyq vırýstyq ınfektsııa taraıtyn kezeń, soǵan baılanysty qalada syrqattanýshylar sany kóbeıdi. Bul týraly onlaın brıfıng barysynda Almaty qalasy sanıtarııalyq-epıdemıologııalyq baqylaý departamenti basshysynyń mindetin atqarýshynyń orynbasary Sádýaqas Baıǵabylov aıtty, dep habarlaıdy QazAqparat tilshisi.

Onyń aıtýynsha, osy jyldyń 1 qyrkúıeginen beri JRVI-diń 114 679 jaǵdaıy tirkeldi, ótken jyly 36 325 jaǵdaı bolǵan.

«Bıyl qalada tumaýdyń H3N2 nusqasy 48 adamda anyqtaldy. Kúzde 174 373 adam tumaýǵa qarsy vaktsına saldyrdy. Onyń ishinde 161 495 adam ekpeni bıýdjet esibinen tegin aldy»,- deıdi Sádýaqas Baıǵabylov.

Sonymen qatar, ol ótken aptada koronavırýs juqtyrǵandardyń 75,7%-y 20 jastan asqan turǵyndar ekenin jetkizdi.

«Ótken aptada mekeme jumysshylary arasynda vırýsty juqtyrý jaǵdaıy ósken, máselen JShS, JK jumysshylary arasynda juqtyrý 21 paıyzdan 25%-ǵa deıin, zeınetkerler arasynda 20-dan 24 paıyzǵa deıin ósti. Degenmen, stýdentter arasynda vırýsty juqtyrý 3%-dan 2,4%-ǵa deıin tómendedi, al oqýshylar arasynda 11-den 6%-ǵa azaıdy»,-dedi ol.

Koronavırýs juqtyrǵan oqýshylardyń 94 paıyzy indetti synyptan emes, otbasynda juqtyrǵany belgili boldy.