Almatyda koronavırýsqa 100 myńǵa jýyq test jasaldy

ALMATY. QazAqparat – Almatyda koronavırýsty anyqtaý boıynsha 100 myńǵa jýyq PTR-test tapsyrylǵan. Bul týraly onlaın brıfıng barysynda aıtyldy, dep habarlaıdy QazAqparat tilshisi.

«PTR-dıagnostıka – nátıjeni barynsha dál kórsetetin dıagnostıka. Qazir qalada 99500 tekserý jasalǵan. Bul – respýblıka boıynsha eń úzdik kórsetkish. Osy tásilmen 1848 naýqas anyqtaldy», - dedi Almaty qalasynyń bas sanıtarlyq dárigeri Jandarbek Bekshın.

Onyń aıtýynsha, zerthanalar zamanaýı qural-jabdyqtarmen qamtamasyz etilýde. Ulttyq saraptama ortalyǵynyń bólimshesine jaqynda alynǵan apparat RNQ-ny avtomatty rejımde anyqtaýǵa múmkindik beredi. Bul, zerthananyń qýatyn 40 paıyzǵa arttyrdy.

Bas sanıtarlyq dáriger atap ótkendeı, qazir Almatyda koronavırýsty juqtyrý jaǵdaılarynyń anyqtalý jıiligi joǵary bolyp otyr.