Almatyda koronavırýs juqtyrǵandardyń sany eki esege artty degen aqparat jalǵan

ALMATY. QazAqparat– Almaty qalasynyń sanıtarııalyq-epıdemıologııalyq baqylaý departamenti, BMSD-niń 30.10.2020 jylǵy №2 messendjerlerde jarııalanyp, taratylyp jatqan «Sanıtarlyq-epıdemıologııalyq is-sharalardy ótkizý týraly» qaýlysy jalǵan aqparat ekendigin málim etti, dep habarlaıdy QazAqparat tilshisi.

Áleýmettik jelilerde taraǵan aqparatta, Almaty qalasynda qyrkúıek-qazan aılarynda KVI juqtyrǵandardyń sany eki esege, 165-360-qa deıin deıin óskeni týraly jazylǵan. Sonymen qatar, epıdemıologııalyq tergeý anyqtaǵandaı, adamdar aýrýdy qoǵamdyq oryndarda, ujymda jáne kópqabatty úılerdiń kireberisinen juqtyrǵan delingen.

Óz kezeginde Almaty qalasynyń Taýarlar men kórsetiletin qyzmetterdiń sapasy men qaýipsizdigin baqylaý departamenti bul aqparattyń shyndyqqa janaspaıtynyn málim etti.

«Almaty qalasynyń Taýarlar men kórsetiletin qyzmetterdiń sapasy men qaýipsizdigin baqylaý departamenti «bas memlekettik dárigeriniń sońǵy №64 qaýlysy «Almaty qalasynda koronavırýstyq ınfektsııa aýrýynyń aldyn alý jónindegi odan arǵy sharalar týraly» 2020 jyldyń 26 qazanynda shyǵarylǵandyǵyn habarlaımyz. Almaty qalasynyń sanıtarııalyq-epıdemıologııalyq baqylaý departamenti, BMSD-niń 30.10.2020 jylǵy №2 messendjerlerde jarııalanyp taratylyp jatqan «Sanıtarlyq-epıdemıologııalyq is-sharalardy ótkizý týraly» qaýlysy jalǵan aqparat ekendigin aıtamyz»,– delingen habarlamada.