Almatyda koronavırýs juqtyrǵandardyń 77 paıyzy - vaktsına almaǵandar

ALMATY. QazAqparat - Almatyda qala ákimi Baqytjan Saǵyntaevtyń tóraǵalyǵymen koronavırýs taralýynyń aldyn alý jónindegi jedel shtabtyń kezekti otyrysy ótti. Onda sanıtarlyq-epıdemıologııalyq ahýaldy turaqtandyrý, ólim-jitimdi azaıtý jáne vaktsınalaný qarqyny máseleleri qaraldy, dep habarlaıdy QazAqparat tilshisi.

Jıyn barysynda Almatyda naýqastardyń jas quramyn salystyrmaly taldaý kezinde bir apta ishinde dert juqtyrǵandardyń 77%-y vaktsına almaǵan 20 jastan asqan azamattar ekendigi belgili boldy. 14 jasqa deıingi balalar arasynda juqtyrǵandar sany 2,2%-ǵa, 40-59 jastaǵy adamdar arasynda 1,4%-ǵa óskeni baıqalady.

Syrqattanýshylardyń ınfektsııany saýda obektilerinde - 28%, qoǵamdyq kólikterde - 21,4%, otbasylardaǵy baılanystar - 22,3% jáne bazarlarda - 8% juqtyrǵan. Úıde ınfektsııa juqtyrý4,4%-ǵa ósti. Dert týystarmen, kórshilermen jáne tanystarmen baılanys kezinde, sondaı-aq otbasylyq is-sharalardy merekeleý sanynyń ósýine oraı taralýda.

Belgilengen karantındik shekteýlerdiń saqtalýyn qamtamasyz etý boıynsha monıtorıngtik toptardyń jumysy jalǵasýda. 25-31 qazan aralyǵynda kásipkerlik nysandarynda 19 jáne qoǵamdyq kólikterde maska rejımi saqtalmaǵan 23 buzýshylyq anyqtaldy.

Aıta keterligi, dúısenbiden bastap Almatyda «sary» aımaqtyń talaptary qoldanylady. Ashyq jobasyna qatysýshylardyń jumys uzaqtyǵy 1 saǵatqa, joba jetekshileriniń jumys ýaqyty túngi saǵat 3-ke deıin uzartyldy. Barlyq nysandar Bas memlekettik sanıtarlyq dárigerdiń qaýlysyna sáıkes «sary» aımaq rejımi boıynsha jumys isteıdi. Sonymen qatar, ótken aptada Ashyq jobasy boıynsha oqshaýlaý rejımin buzǵan 100 qala turǵynynda «qyzyl» mártebe anyqtaldy. Kóbinese buzýshylyqtar SOO-da, dúkenderde jáne tamaqtaný obektilerinde oryn alýda.

Búgingi kúni ınfektsııalyq statsıonarlarda 1 039 adam, onyń ishinde 35 bala bar. Reanımatsııa jáne qarqyndy terapııa bólimshelerinde 93 patsıent emdelýde. Mobıldi medıtsınalyq brıgadalar men telemedıtsına ortalyǵynyń baqylaýyna 2 124 patsıent alynǵan.

Keńes barysynda Biontech jáne Pfizer birlesip ázirlegen «Komırnatı» preparatymen vaktsınalaýǵa daıyndyq máseleleri qaraldy. Preparattyń jetkizilýi osy aıǵa josparlanǵan.

Almaty ákimdigi qala turǵyndarynan densaýlyqtaryn saqtaý úshin vaktsına alýǵa shaqyrady. Qalada kún saıyn 137 vaktsınalaý pýnkti jumys isteıdi.

Sonymen birge, ahýaldyń turaqtanýy men optımıstik boljam boıynsha damýǵa qaramastan, epıdemıologtar yqtımal nasharlaý týraly eskertedi. Buǵan Eýropa men Reseıdegi epıdemıologııalyq ahýaldyń órshı túsýi, vaktsınalaný qarqynynyń tómendeýi yqpal etýi múmkin. KVI-ge qarsy vaktsıany ekpe salýǵa jatatyn qala turǵyndarynyń jalpy sanynyń keminde 80%-y alýy tıis.