Almatyda koronavırýs juqtyrǵandardyń 36%-y — jastar

ALMATY. QazAqparat - Almatyda koronavırýs juqtyrǵandardyń 36%-y jastar. Bul týraly onlaın brıfıng barysynda qalalyq sanıtarııalyq-epıdemıologııalyq baqylaý departamentiniń basshysy, qalanyń bas memlekettik sanıtar dárigeri Jandarbek Bekshın aıtty, dep habarlaıdy QazAqparat tilshisi.

Onyń aıtýynsha, bıyl koronavırýs ınfektsııanyń damý dınamıkasy kúrt ósti. Ásirese, 20-30 jas aralyǵyndaǵy turǵyndar jıi shaldyǵyp jatyr.

«Almatyda koronavırýs juqtyrǵandardyń 36 paıyzy jastarǵa tıesili. Sondaı-aq, bir jasqa deıingi balalar arasynda ósý baıqalady. Oqýshylar arasynan da shyǵyp jatyr. Aıta ketý kerek, bul balalardyń barlyǵy onlaın oqyp jatqandar. Árbir ekinshi adam otbasynda ınfektsııany juqtyrady. Sımptomatıkalyq naýqastardyń sany artyp, 90% deıin jetedi»,-dedi Jandarbek Bekshın.

Sonymen qatar, ol qalada koronavırýs juqtyrǵandardyń sany 8 naýryzdan bastap kóbeıgenin aıtty.

«Endi mamyr merekeleri kele jatyr. Osyǵan baılanysty almatylyqtardy barlyq sanıtarlyq talapty saqtaýǵa shaqyramyn. Halyq kóp shoǵyrlanatyn jerlerge barmaýǵa keńes beremiz», - dep túıindedi ol.