Almatyda koronavırýs naýqastary úshin qosymsha tósek-oryndar daıyndaldy

ALMATY. QazAqparat – Almatyda koronavırýsqa shaldyqqan naýqastar úshin qosymsha tósek oryndary daıyndaldy. Bul týraly qalalyq Qoǵamdyq densaýlyq basqarmasy basshysynyń orynbasary Svetlana Sultanǵazıeva málim etti, dep habarlaıdy QazAqparat tilshisi.

«Búgingi kúni qalada 7 045 tósek-oryn bar. Jaqynda ǵana oryn sany 6 myń bolǵan. Sońǵy kúnderi aýrýdyń órshýine baılanysty qosymsha tósek oryndary daıyndaldy. Rezervtik tósekter Oqý-klınıkalyq ortalyǵy sııaqty oryndarda daıyndalǵan.

Sonymen qatar Goncharnaıa kóshesindegi Ftızıopýlmonologııa ortalyǵynda qosymsha 100 oryn quryldy. Buǵan qosa, Gýmanıtarlyq-pedagogıkalyq kolledjdiń ǵımarattarynda 300 tósek-oryn daıyndaldy. Erteńnen bastap «HAK» medıtsınalyq ortalyǵynyń bazasynda 130 oryn ashylady. Taǵy basqa uıymdar da qosylýda»,- dedi ol Óńirlik kommýnıkatsııalar qyzmetindegi brıfıngide.

Onyń aıtýynsha, qalada 700 jansaqtaý orny daıyndalǵan, olardyń 310-ynda naýqastar jatyr. Jansaqtaý oryndarynyń 44% bos emes.

Buǵan deıin habarlanǵandaı, epıdemıologııalyq ahýal nasharlaǵan jaǵdaıda Almaty statsıonarlarynda oryn sany 10 myńǵa deıin arttyrylatyn bolady.