Almatyda kópqabatty úıler men balabaqsha mańynda jylan órip júr

ALMATY. QazAqparat - Almatyda kópqabatty úılerdiń kireberisi men jertólesinde, qalyń shóp arasynda jylandar jıi paıda bola bastady, dep habarlaıdy QazAqparat tilshisi.

Qala turǵyndary úılerdiń arasynda órip júrgen jylandardyń vıdeosyn áleýmettik jelide taratyp jatyr.

«Men bizdiń aýdanda jylandy jıi kórem. Olar kópqabatty úılerdiń mańynda júredi. Biz qalanyń shetinde turamyz. Aınalamyzda bos jatqan jer kóp. Múmkin sol jaqtan keletin shyǵar. Balam baratyn balabaqshada da jylandar shyǵypty dep estidim. Balalarymyzdyń qaýipsizdigine alańdaı bastadyq», - dedi QazAqparat tilshisine Almatydaǵy «Zerdeli» shaǵynaýdanynyń turǵyny Áıgerim Abdan.

Bul aqparatty Alataý aýdanynda ornalasqan №148 bóbekjaı-balabaqshanyń meńgerýshisi Raıa Sharapıeva da rastap otyr.

Onyń aıtýynsha, balabaqsha aýmaǵynda naýryz aıynda jylanǵa qarsy dezınfektsııa júrgizilgen. Kelesi kezeń shilde aıyna josparlanyp otyr.

«Qala ishinde jylandardyń paıda bolýy - jaz mezgilindegi eń ózekti máseleniń biri. Olardyń aýdanda ǵana kórinbeı, balabaqsha aýmaǵyna da kirgeni bizdi alańdatty. Baqytymyzǵa oraı, jylan eshkimdi shaqqan joq. Biz úshin balalardyń qaýipsizdigin qamtamasyz etý mańyzdy. Tárbıeshilermen birge kúndelikti túsindirý jumysyn júrgizemiz. Balalardy dalaǵa shyǵarmas buryn, oıyn alańdaryn tekseremiz. Ár toptyń tárbıeshisi balalardyń janynda, kózden tasa qylmaıdy. Sondaı-aq ata-analardan serýen kezinde balalaryn oıyn alańdarynda jalǵyz qaldyrmaýyn suraımyz», - dedi Raıa Sharapıeva.

Zoologııa ınstıtýtynyń gerpetolog mamany ıÝlııa Zıma qala ishinde jylandardyń nelikten kóbeıip ketkenin túsindirdi.

«Qala qarqyndy damyp keledi, jylandar mekendegen dalalardyń ornynda jańa shaǵynaýdandar paıda bolyp jatyr. Jerdi ıgergennen keıingi alǵashqy jyldarda da jylan shyǵady, biraq birte-birte joǵalyp ketedi», - deıdi maman.

Onyń aıtýynsha, Almaty qalasynyń mańynda ýly jylannyń eki túri ǵana mekendeıdi. Olar - dala jylany men kádimgi qalqantumsyq jylan.

«Megapolıste adamdar kóbine órnekti jáne sý jylanyn kezdestiredi. Olar qaýipti emes. Shaǵyp alsa da, tez jazylyp ketedi. Desek te, saqtyq sharalaryn saqtaǵan jón. Eger jylan shaǵyp alsa, mindetti túrde dárigerge júginý kerek»,-dedi ol.