Almatyda kópirden temir jolǵa sekirmek bolǵan áıel qutqaryldy
Almaty qalalyq polıtsııa departamentiniń málimetinshe, sýıtsıd jasamaq bolǵan áıeldi qutqarý operatsııasy Jetisý aýdanynda ornalasqan kópirde júrgizilgen.
Tańǵy saǵat 06:57-de «102» pýltine kópirden bireýdiń sekireıin dep turǵany týraly qońyraý kelip tústi.
Dabyl boıynsha birinshi bolyp «Býran-183» patrýldik ekıpajy jolǵa shyqty.
Onyń quramynda patrýldik polıtsııa polkiniń ınspektorlary Nurlan Qydyrbaı men Naýryz Dánekeev boldy.
«Derek rastaldy. Áıeldiń kópirden sekirgisi kelip turǵanyn kórdik. Biz onyń qolynan ustap aldyq. Ol shok kúıinde boldy. Alaıda keıinirek poıyz kútip turǵanyn túsindirdi: ol poıyzdyń astyna sekirip, ózine qol jumsaǵysy kelgen. Oqıǵa ornyna tergeý-jedel toby shaqyryldy. Mán-jaıdy bilý úshin áıeldi solarǵa tapsyrdyq», – dedi Naýryz Dánekeev.
Jetisý aýdandyq polıtsııa basqarmasynda jetkizilgen áıel otbasyndaǵy kelispeýshilik saldarynan ózine qol jumsaýǵa bel býǵanyn aıtqan.
Oǵan psıhologııalyq kómek kórsetildi.
Kadr ız vıdeo polisia.kz