Almatyda kópbalaly analarǵa nesıe qaryzdary boıynsha týyndaǵan máseleler túsindirildi

ALMATY. QazAqparat – Almatyda kópbalaly analarǵa ekinshi deńgeıli bank ókilderi nesıe berýdegi túıitkil máselelerdi túsindirdi. Shara «Nur Otan» partııasy Almaty qalalyq fılıalynyń qoldaýymen «Baqytty otbasy» partııalyq jobasy aıasynda ótti, dep habarlaıdy QazAqparat tilshisi.

Megapolıstiń segiz aýdanynyń kópbalaly analary onlaın rejıminde bank ókilderine suraq qoıdy. Mysaly, Alataý aýdanynyń turǵyny Venera Karıbaeva qaıtys bolǵan adamnyń nesıelik mindettemeleri jaqyn týystaryna aýysýyna qatysty másele kóterdi.

Al, Almaly aýdanynyń turǵyny Áıgerim Habıeva pandemııa kezinde jeke kásipkerler úshin qandaı jeńildik qarastyrylǵanyn surady.

Bul saýalǵa Qarjylyq qyzmetterdi tutynýshylardyń quqyqtaryn qorǵaý departamenti dırektorynyń orynbasary Ernar Orazbaev jaýap berdi.

«Osyndaı mazmundaǵy barlyq ótinishter men usynystardy bankter jeke tártipte, biraq qujattardyń tolyq paketi bolǵan jaǵdaıda ǵana qaraıdy. ıAǵnı, balalardyń týý týraly kýálikgi jáne pandemııadan týyndaǵan kiristi joǵaltý týraly anyqtama. Alaıda, barlyq qaryz alýshylar ózderiniń minsiz nesıe tarıhy týraly alańdaýy, tólem tártibin saqtaýy jáne ony túzetýi kerek. Óıtkeni, qoldanystaǵy zańnamaǵa sáıkes, bank klıentiniń nesıe tarıhy 10 jyl saqtalady»,– dedi ol.

Onyń aıtýynsha, bıyl qaryz alýshynyń tólem qabilettiligin baǵalaýǵa qoıylatyn talaptar aıtarlyqtaı qatańdatyldy. Buryn baqylaýsyz tutynýshy nesıesin bergen mıkroqarjy uıymdary, lombard jáne basqa da qarjy mekemeleriniń qyzmeti memleket tarapynan retteledi. Alaıda, mamandardyń aıtýynsha, táýekel qateri áli de bar. Ásirese daǵdarys pen halyq tabysynyń tómendeýi kezeńinde.