Almatyda kópbalaly analarǵa kásip ashýǵa 406 mln teńge grant berildi

ALMATY. QazAqparat – Almaty ákimi Baqytjan Saǵyntaev Ortalyq kommýnıkatsııalar qyzmetinde ótken brıfıngide kópbalaly analarǵa jáne múmkindigi shekteýli adamdarǵa kórsetiletin qoldaý sharalary týraly aıtty, dep habarlaıdy QazAqparat tilshisi.

Kópbalaly analarǵa qoldaý kórsetý úshin óńirlik «Baqytty otbasy» ortalyqtarynda «Іsker ana» baǵdarlamasy iske qosyldy. Munda olardy «Eńbek» memlekettik baǵdarlamasy aıasynda kásipkerlik negizderine oqytady.

«Kópbalaly otbasylardan 888 adam 555 myń teńgege deıin grant aldy. Sonymen qatar, 406 mln teńge somasyna 203 kópbalaly ana 5 mln teńgege deıingi grantty ıelendi. «Shyńǵa órleý» áleýmettik klýby jobasy iske qosyldy. Jobada qoǵamdyq ómirge aǵa býyn ókilderin tartý kózdeledi. Munda olar ártúrli formattaǵy nátıjeli, ekijaqty qarym-qatynas arqyly az qamtylǵan jáne kópbalaly otbasylarda tárbıelenetin bastaýysh mektep jasyndaǵy balalar men erekshe qajettiligi bar balalarǵa ómirlik tájirıbe berip, bilim men daǵdylarǵa úıretedi»,– dedi ákim.

Sonymen qatar, ol múgedek jandardy áleýmettendirý jáne jumysqa ornalastyrý maqsatynda alǵash ret «Ten Qogam» áleýmettik qoldaý ortalyǵy ashylǵany atap ótti.

«Ortalyqta múgedek adamdarǵa jáne olardyń otbasylaryna aqparattyq, konsýltatsııalyq, zańgerlik jáne psıhologııalyq qoldaý kórsetiledi. Jumysqa ornalasýǵa járdemdesedi, múgedek adamdardy qoǵamǵa tıimdi beıimdeý úshin turmystyq jáne áleýmettik daǵdylarǵa oqytady»,– dep qortyndylady Baqytjan Saǵyntaev.