Almatyda kópbalaly analardyń qolynan shyqqan ónimderdi satatyn dúken ashyldy

ALMATY. QazAqparat – Almatyda «Isker ana» dúkeni ashyldy. Bul joba bıznestiń áleýmettik jaýapkershiligi aıasynda júzege asyryldy. Dúkende kópbalaly analarynyń qolynan shyqqan ónimder satylady, dep habarlaıdy QazAqparat tilshisi.

«Baqytty otbasy» ortalyǵynda kópbalaly analar jańa kásip túrin ıgerip, qoljetimdi granttardyń arqasynda óz bıznesin ashý múmkindikterine ıe boldy.

Aıta ketý kerek, jańadan ashylǵan dúkendegi barlyq ónim «Isker ana» oqý ortalyǵynda daıyndalady.

Ortalyqta tigin jáne kıiz sheberhanasy bar. Lıýnevıl kesteleri, quraq kórpe, toqyma, ulttyq kıim tigý boıynsha oqý kýrstary ótkiziledi. Tamyz aıynda ǵımarat jóndeldi. Jańa jabdyqtar ornatylyp, tehnıkalyq jabdyqtaý keńeıtildi.

Eske salaıyq, «Isker ana» oqý ortalyǵynda kópbalaly jáne az qamtylǵan otbasylardyń analary, múmkindigi shekteýli áıelder bıznes jáne marketıng boıynsha kýrs oqıdy.

Osy jyly Almatyda «Eńbek» nátıjeli jumyspen qamtý baǵdarlamasyn iske asyrý aıasynda, 117 kópbalaly jáne 574 az qamtylǵan analarǵa óz bıznesin ashý jáne bıznes-ıdeıalardy iske asyrý úshin 200 AEK-ke deıin grant berildi.

Dúken Súıinbaı dańǵylyndaǵy 263-úıde ornalasqan.