Almatyda Konstıtýtsııa kúnine arnalǵan velosherý «Ekstrım tolqynyna» ulasty
"Nurly Taý" bıznes ortalyǵynan bastaý alǵan 9 shaqyrymdyq qashyqtyq M.Gorkıı atyndaǵy ortalyq mádenı jáne demalys saıabaǵynda aıaqtaldy. 600-ge jýyq qatysýshynyń arasynda kóptegen syılyqtar oınatylyp, sertıfıkattar taratyldy. Áýesqoılardyń arasynda Norvegııa elinen kelgen "Bike for Peace" jobasynyń prezıdenti Tor Nıarland ta boldy. Ol 40 jyl boıy álem úshin kóptegen veloqozǵalystar uıymdastyryp, atomdyq qarý-jaraqtarǵa qarsy jobalar júrgizip kele jatqanyn aıtty. Sondaı-aq sheteldik meıman QR Prezıdenti Nursultan Nazarbaevtyń ıadrolyq qarýdan bas tartý saıasaty jaıly óz kitabyna jazǵanyn málimdedi.
«Men osymen Qazaqstanǵa úshinshi ret kelip otyrmyn. Almaty qalasyna kishkentaı kezimde kelgen bolatynmyn. Bul qalada ádemi jerler óte kóp. Ásirese taýy men turǵyndardyń sportpen belsendi aınalysatyndyǵy meni tánti etedi. Negizi osy elge Astanada bolatyn xalyqaralyq konferentsııaǵa qatysýǵa kelgenmin. Almatyda ózimiz keshe taý jaqta velosherý uıymdastyrǵanbyz. Almaty qalasy ákimdigi tarapynan usynys túskennen keıin, osy velosherýge qatysýǵa bel býdym», - dedi Tor Nıarland.
Sonymen qatar, belsendilik tanytyp, erekshe ulttyq kostıým kıgen almatylyqtarǵa "Sporttyq Almaty" usynǵan fırmalyq fýtbolkalar men 9 qyrkúıek kúni "Almaty Arenada" ótetin jekpe-jek keshine bıletter berildi. Olardy "Alash pride" sportshysy Evgenıı Egemberdıev taratty. Al lotereıada úsh velosıped oınatyldy.
Velosherýden keıin Ortalyq saıabaq mańynda ektremaldy sport túrlerinen "Extrem tolqyny" BMX, skeıtbordıng, rolık jáne samokat, sonymen qatar bı shoýy, popıng (1h1), hıp-hop (1h1), breık dans (1h1, 3h3), vakıng (1h1) bı túrlerinen jarystar óz jalǵasyn tapty. Jalpy is-sharaǵa Qazaqstannyń túkpir-túkpirinen, sondaı-aq BAÁ, Ózbekstan, Qyrǵyzstan, Ońtústik Amerıka jáne taǵy da basqa elderden 1500-ge jýyq ekstremaldar men bıshiler qatysty.
Bı shoýynyń úzdik komandasy atanǵan bıshiler toby 300 myń teńgeni jeńip aldy, bul jarystyń eń úlken aqshalaı syıaqysy.