Almatyda kommýnaldyq tarıfterdiń qymbattaýyna baılanysty kimderge ótemaqy tólenedi

ALMATY. QazAqparat – Almaty máslıhaty kommýnaldyq qyzmetterge tarıfterdiń kóterilýine baılanysty áleýmettik kómek kórsetý qaǵıdalaryn bekitti jáne halyqtyń áleýmettik osal toptary úshin ótemaqy mólsherin belgiledi, dep habarlaıdy QazAqparat tilshisi.

Qaǵıdalar Almaty qalasy ákiminiń tapsyrmasy boıynsha «Investıtsııalarǵa aıyrbastaý tarıfi» baǵdarlamasy aıasynda kommýnaldyq qyzmetterge tarıfterdiń ósýine baılanysty ázirlendi.

«Qazirgi ýaqytta qalada HÁOT sanatyna jatatyn 315 430 azamat turady. Onyń ishinde: jasy boıynsha 237 740 zeınetker, 35 562 kópbalaly ana jáne kópbalaly otbasy. Birinshi jáne ekinshi toptaǵy múgedektigi bar 28 433 adam, múgedek balalardy tárbıelep otyrǵan 8 591 otbasy, memlekettik mekemelerdi oryndaý kezinde qaza tapqan adamdardyń 534 otbasy, soǵys ardageri – 54 , basqa memleketter aýmaǵyndaǵy 2 987 jaýyngerlik is-qımyl ardageri, sonymen qatar jeńildikter boıynsha soǵys ardagerlerine teńestirilgen 1 538 adam», - dep habarlady ákimdikten.

Kommýnaldyq tarıfterdiń ósýine baılanysty ótemaqy HÁOT ótinishi boıynsha 2023 jylǵy 1 shildeden 31 jeltoqsanǵa deıin aı saıyn 0,5 AEK (1 725 teńge) mólsherinde tólenedi. Bul soma sýmen jabdyqtaý, sý burý, gaz, jylytý jáne t.b. qosqanda, 12 qyzmet boıynsha tarıfterdiń ósýin jabady.

HÁOT sanatyna jatatyn tulǵalarǵa ótemaqy resimdeý úshin aýdandyq jumyspen qamtý jáne áleýmettik baǵdarlamalar bólimderine nemese áleýmettik qyzmetter úıine ótinishpen júginý qajet.

Múgedektigi bar adamdar «E-gov» elektrondyq úkimet portaly arqyly ótinish bere alady. Ótinishter qaralyp, oń sheshim qabyldanǵannan keıin tólemder ótinish berýshilerdiń ekinshi deńgeıdegi bankterdegi shotyna túsedi.