Almatyda komıssııaǵa da, saılaýshylarǵa da qysym bolǵan joq - TMD mıssııasy

ALMATY. QazAqparat -TMD mıssııasynyń halyqaralyq baıqaýshysy Valentın Kolıasev Almatydaǵy jalpyqalalyq baspasóz ortalyǵynda ótken brıfıngte saılaý ýchaskelerinde eshqandaı zańbuzýshylyqtardyń oryn almaǵanyn atap ótti, dep habarlaıdy QazAqparat tilshisi.

Valentın Kolıasevtiń aıtýynsha, TMD mıssııasynan Qazaqstanda ótip jatqan saılaýǵa qatysý úshin 234 adam tirkelgen. Onyń tórteýi Almatyda jumys istep jatyr.

«Biz tańerteń shamamen 10 saılaý ýchaskesine bardyq. Tórt ýchaskeniń ashylýynda boldyq. Saılaý ýchaskelerinde eshqandaı zańbuzýshylyqty baıqamadyq», – dedi halyqaralyq baıqaýshy.

Sonymen qatar, ol saılaý protsesiniń uıymdastyrylýyna toqtaldy.

«Bizdi qorǵanys kostıými men maska kıgen adamdar qarsy aldy, maska kıgizip, temperatýrany ólshedi. Zalda baıqaýshylar úshin 10 oryn boldy. Jumystyń basynda da, protseste de barlyǵy esh kedergisiz QR zańnamasynyń normalary boıynsha oryndaldy. Komıssııaǵa da, saılaýshylarǵa da qysym bolǵan joq. Meniń oıymsha, bul turǵyda bári oıdaǵydaı boldy», – dep atap ótti V.Kolıasev.

Baıqaýshy sanıtarlyq normalardyń saqtalýyna erekshe nazar aýdardy.

«Barlyq sanıtarlyq normalar saqtaldy. Baıqaýshylar bir-birinen 2 metr qashyqta otyrdy. Barlyǵy betperde, arnaıy halattar men kaska kıip otyrdy»,– deıdi V.Kolıasev