Almatyda kómekke muqtaj 1,7 myń otbasyǵa azyq-túlik taratyldy

ALMATY. QazAqparat – Nur Otan partııasynyń almatylyq fılıaly az qamtylǵan otbasylarǵa azyq-túlik jetkizýdi jalǵastyrýda, dep habarlaıdy QazAqparat tilshisi.

Partııanyń almatylyq fılıaly «Metall Prom» JShS bas dırektory, partııa múshesi Abdýhalıl Dolkýntaımen birlesip Elbasynyń bastamasymen jalǵasyp kele jatqan #BizBirgemiz aktsııasy aıasynda 1 700 az qamtylǵan otbasyna 51 tonna azyq-túlik jetkizdi.

Ár otbasyna 30 keli azyq-túlik berildi. Onda un, makaron, suıyq maı, kúrish, qaraqumyq pen qant bar.

«Elbasy jarııalaǵan #BizBirgemiz aktsııasy aıasynda az qamtylǵan otbasylarǵa qosymsha kómek kórsetý maqsatynda qarajat bólip, 1 700 otbasyǵa bardyq. Bul aktsııaǵa Jas Otan jastar qanatynyń volonterleri qosyldy. Olar azyq-túlikti kórsetilgen úılerge jetkizýge kómektesti. Olardy qajetti qorǵanys quralymen qamtamasyz ettik», - dedi D. Abdýhalıl

Óz kezeginde osyndaı qoldaýǵa ıe bolǵan, ІІ toptaǵy múgedek qyzdy tárbıelep otyrǵan Rábıǵa Álmaǵambetova Elbasynyń #BizBirgemiz atty ıgi bastamasyna, «Nur Otan» partııasy men volonterlerge óz alǵysyn bildirdi.

Aıta keteıik, azyq-túlik taratý kezinde barlyq sanıtarlyq normalar saqtaldy.