Almatyda kóktemgi sý tasqynyna daıyndyq pysyqtaldy

ALMATY. QazAqparat – Almaty qutqarýshylary sý tasqyny jáne qar kóshkini kezinde shuǵyl atqarylatyn is-áreketterdi pysyqtap jatyr. «Kóktem-2020» respýblıkalyq ekikúndik jattyǵý barysynda salalyq qurylym mamandarynyń ózara baılanysyna basa mán berildi, dep habarlaıdy QazAqparat tilshisi.

Almaty qalalyq Tótenshe jaǵdaılar departamentiniń baspasóz qyzmetinen málim etkendeı, negizgi jattyǵý Naýryzbaı jáne Alataý aýdandaryndaǵy 3 ýchaskede, Qarǵaly ózeniniń jaǵasynda júrgizildi. Onda ózen arnalary muz ben shógindilerden tazartyldy. Júrgizilgen jumystardyń nátıjesinde, sý basý qaýpi joıyldy.

Jalpy, 7 shaqyrym ózen arnalary tazartylyp, 403 tekshe metr qar jáne qatty turmystyq qaldyqtar shyǵaryldy.

«Oqý jattyǵýǵa 300 adam jáne 52 tehnıka: sonyń ishinde, QR Ulttyq ulannyń «Ońtústik» óńirlik qolbasshylyǵynan 100 adam jáne 5 tehnıka, qalanyń azamattyq qorǵaý qyzmetterinen 153 adam, 39 tehnıka jáne QR ІІM TJK aýmaqtyq bólimshelerinen 46 adam, 8 tehnıka qatysty»,– dep habarlady qalalyq TJD-dan.

Júıeli baqylaýdy uıymdastyrý, sý tasqyny saldaryn boldyrmaý jáne joıý jónindegi sharalardy ázirleý maqsatynda 2019 jyly Tótenshe jaǵdaılar departamenti jıi sý basatyn 26 ýchaskeni esepke aldy. Búgingi kúni 9 ýchaskede sý basý qaýpi joıyldy, qalǵan 17 ýchaskede jalpy uzyndyǵy 376 shaqyrym bolatyn aryq jelilerin tartý jáne qaıta qalpyna keltirý úshin jobalyq-smetalyq qujattama ázirlenýde.

Oqý-jattyǵý barysynda, Almaty qalasynyń TJD, QR Ulttyq ulannyń aýmaqtyq bólimsheleri, qalanyń azamattyq qorǵaý qyzmetteri, kóktem maýsymynda tótenshe jaǵdaılardy joıýǵa daıyn ekendikterin kórsetti.