Almatyda qısaıǵan úıdiń mańyna terek otyrǵyzylady

ALMATY. QazAqparat – «Zerdeli–6» shaǵyn aýdanyndaǵy qısaıǵan úıdiń mańyna terek otyrǵyzylady. Bul týraly Almaty qalalyq jasyl ekonomıka basqarmasynyń basshysy Erjan Seıtenov aıtty, dep habarlaıdy QazAqparat tilshisi.

«Biz Alataý, Saıaly jáne Zerdeli shaǵyn aýdandarynda terek otyrǵyzýdy josparlap otyrmyz. Ózderińiz bilesizder, mundaǵy kópqabatty turǵyn úıler jerasty sýynyń kóterilýinen sál ǵana qısaıyp tur. Al terek - jer asty sýyn ózine sińirip alatyn aǵash, ol jer asty sýyn tómenge túsirýge kómektesedi. Sonymen qatar, terek bárinen buryn kómirqyshqyl gazyn sińiredi jáne ottegin bólip shyǵarady», - deıdi Erjan Seıtenov.

«Qalanyń erekshe mártebesi týraly» Zańdy túsindirýge arnalǵan baspasóz konferentsııasynda ol aldaǵy úsh jyl ishinde megopolıste 1 mıllıonnan astam aǵash otyrǵyzý josparlanyp otyrǵanyn atap ótti.

Eske salaıyq, 11 jeltoqsanda Alataý aýdanyndaǵy «Zerdeli» shaǵyn aýdanynyń turǵyndary úıleriniń qısaıǵanyn aıtyp, dabyl qaqqan bolatyn.

Keıin Baqytjan Saǵyntaev qısaıǵan úıdiń turǵyndarymen kezdesip, ákimdik olardy kóshirýge daıyn ekenin jetkizdi.