Almatyda kıbersportshylar úshin «Ar Namys» klýby ashyldy
Almaty qalalyq kreatıvti ındýstrııa basqarmasynyń «Ar Namys» klýby ashyldy.
Іs-shara barysynda Eýropa jáne álem chempıonattarynda elimizdiń atynan shyǵatyn tanymal kıbersportshylardan turatyn komandanyń birinshi quramy tanystyryldy.
Komandanyń barlyq qatysýshylarymen kásibı kelisimshartqa qol qoıyldy jáne olarǵa eń zamanaýı gadjetter berildi.
2018 jyldan bastap kıbersport Qazaqstanda resmı sport túri retinde tanylǵany belgili.
«Alǵa qoıǵan úlken maqsattarymyz bar. Halyqaralyq týrnırlerde eń joǵary oryndarǵa ıe bolý úshin bar kúshimizdi salamyz. Bizdiń komandamyz úzdik oıynshylardan turady», - dedi jańa komandanyń negizin qalaýshylardyń biri Qaırat Qudaıbergen.
Almaty qalasy ákiminiń kreatıvti ekonomıka jónindegi keńesshisi Ernar Qurmashevtyń aıtýynsha kıbersport búkil álemde qarqyndy damyp keledi.
«Bizdiń mindetimiz - halyqaralyq týrnırlerde jaqsy nátıje kórsetip júrgen jastarymyzdy qoldaý jáne álemdik kıbersport kartasynan óz ornyn alý. Osy maqsatta biz kıbersportty perspektıvaly ındýstrııalardyń biri retinde Almatynyń kreatıvti ekonomıkasyn damytý strategııasyna engizdik. Kıbersportqa júıeli qoldaý kórsetý jáne túrli týrnırlerdi uıymdastyrý josparda bar. Bul da Almatyny jastardyń kreatıvti qalasy retinde dáripteıdi», - dedi Ernar Qurmashev.
Aıta keterligi, «Almaty-2050» damý Strategııasyna sáıkes qala ekonomıkasynda kreatıvti ekonomıkany damytý baǵytynda qurylymdyq manevrdi júzege asyrý josparlanǵan.
Megapolıs standartty emes oılaý qabileti bar kreatıvti, talantty jáne biregeı adamdardǵa únemi qoldaý kórsetetini, al zamanaýı tsıfrlyq quraldardyń bolýy qala ekonomıkasynyń ósý serpinin arttyratyny atap ótildi.