Almatyda keýde qýysy ishke kirip ósken eki jasóspirimge ota jasaldy

ALMATY. QazAqparat – Almatyda Balalar shuǵyl jedel medıtsına kórsetý ortalyǵynda «keýde qýysynyń deformatsııasy» aqaýyna baılanysty 14 jastaǵy eki naýqasqa «Torakoplastıka» otasy jasaldy. Ota josparly túrde «Nuss» ádisi boıynsha jasaldy, dep habarlaıdy QazAqparat tilshisi.

Otaǵa deıin eki balada da fızıkalyq júkteme kezinde (júrý) entigý, sharshaý baıqalatyn. Balalar hırýrgy Meıirjan Qurmanalıevtiń aıtýynsha, balalarda keýde qýysynyń deformatsııasy jıi kezdesedi. Bul shamamen – 90%. Keýde qýysynyń deformatsııasy qyz balalarǵa qaraǵanda uldarda 5 ese jıi kezdesedi.

«Tós súıeginiń ishke qaraı tartylýynyń negizgi sebebi – tós súıeginiń qabyrǵaǵa jalǵasatyn shemirsheginiń shamadan tys ósýi. Bul súıek tininiń ósýi, shemirshektiń ósýinen artta qalǵanda paıda bolady. Sonyń saldarynan tós súıegi keýde qýysyna ene qalyptasady. Keıbir jaǵdaılarda deformatsııa júre kele nemese meshel aýrýynyń saldarynan bolýy da múmkin», - deıdi hırýrg.

Foto: Almaty qalalyq qoǵamdyq densaýlyq saqtaý basqarmasy

Mundaıda ota kezinde kishkene qatelik jasalsa, keıin aýyr asqynýlarǵa ákelýi múmkin (keýde qýysyna qan ketý, perıkardıt, júrektiń jaraqattanýy). Eger der kezinde asqynýdy aldyn almasa, sońy ólimge alyp kelýi múmkin. «Bul operatsııa az ınvazıvti joǵary tehnologııalyq ádispen endovıdeoskopııanyń kómegi arqyly jasalady. Mundaı ınnovatsııalyq ádis MÁMS aıasynda júzege asyrylady. Eki operatsııa bir saǵatqa sozylyp, ekeýi de sátti ótti. Qazir jigitter ózderin jaqsy sezinedi», – deıdi Meıirjan Qurmanalıev.

Balalardyń ata-analary dárigerlerge alǵys aıtty.

«Meniń ulym qurdastarynyń aldynda kıim aýystyrýǵa uıalatyn. Onyń ústine, ul bolǵan soń fýtbol nemese basqa oıyn túrlerin oınaǵandy unatady, biraq oǵan shamasy kelmeıdi. Óıtkeni ol fızıkalyq júkteme túsirgende tynysy tarylatyn. Dárigerlerge ulymnyń barlyq qurdasy sııaqty bolýyna kómekteskeni úshin kóp raqmet», - dedi jasóspirimderdiń biriniń anasy.

Aıta keteıik, jyl basynan beri Balalar shuǵyl jedel medıtsına kórsetý ortalyǵynynyń hırýrgtary osyndaı 50-ge jýyq ota jasaǵan.

«Atalǵan aýrý balalardyń 80% -ynda ómirge kelgen sátten bastap bir jyldyń ishinde baıqalady, biraq aýrýdyń progressııalyq damýy balanyń maksımaldy ósý kezeńderinde bolady (6-8 jáne 11-13 jasta). Keýde qýysynyń deformatsııasynyń belgileri – kórinetin deformatsııa ǵana emes, júrek pen ókpeniń dısfýnktsııasy sııaqty klınıkalyq belgilerdi de qamtıdy. Sońǵysy ásirese eresek áıelder men erlerde aıqyn kórinedi. Bul deformatsııanyń damýymen baılanysty», - dep habarlady ortalyqtyń baspasóz qyzmeti.