Almatyda kenege qarsy dezınsektsııalyq óńdeý jumystarynyń ekinshi kezeńi bastalady

ALMATY. QazAqparat - Almatyda 15 mamyrdan bastap aýdany 2424,54 ga bolatyn ormandy alqaptarda, qala saıabaqtary men skverlerinde kenelerge qarsy dezınsektsııalyq óńdeý jumystarynyń ekinshi kezeńi bastalady. Bul týraly Almaty qalasynyń sanıtarııalyq-epıdemıologııalyq baqylaý departamentiniń basshysy Qasymhan Alpysbaıuly aıtty, dep habarlaıdy QazAqparat tilshisi.

Spıkerdiń sózinshe, Almatyda 15 mamyr - 5 maýsym aralyǵynda kenege qarsy dezınsektsııalyq óńdeý jumystarynyń ekinshi kezeńi ótedi.

«Óńdeý jumystarymen 8 ormandy alqap (kólemi – 1904,924 ga), 144 qala saıabaqtary men skverleri (kólemi – 519,616 ga) qamtylady jáne aýa-raıyna baılanysty, ıaǵnı, qurǵaq, jaýyn-shashynsyz kúnderi kestege sáıkes 15 mamyrdan 5 maýsymǵa deıin júrgiziledi. Dezınsektsııalyq is-sharany qalalyq sanıtarııalyq-epıdemıologııalyq baqylaý qyzmetiniń mamandarynyń baqylaýymen «Almaty qalasynyń dezınfektsııa ortalyǵy» fılıaly júrgizedi», - dedi Qasymhan Alpysbaıuly.

Jasaqtalǵan dezbrıgadalar qajetti quraldarmen, kóliktermen jáne jeke bas qorǵanysh zattarymen jabdyqtalǵan. Óńdeý jumystaryn júrgizý úshin «Favorıt» akarıtsıdtik preparaty qoldanylady. Preparat az ýytty jáne qaýiptiligi tómen sanatqa jatqyzylady (3-4 klass).

Kenelermen kúresý úshin qoldanylatyn dozalar eń az jáne adamdar men janýarlar úshin qaýipsiz bolyp tabylady.

«Óńdeý jumystary tańǵy saǵattarda júrgiziledi. Óńdeletin aýmaqtardyń shekaralarynda «Kenege qarsy óńdeý júrgizilýde» eskertý habarlamalary bar taqtalar ornatalady», - dedi Almaty qalasynyń SEBD basshysy.

Eske salaıyq, Almatyda 29 naýryz – 28 sáýir aralyǵynda kenelerge qarsy óndeý jumystarynyń birinshi kezeńi ótken bolatyn.