Almatyda kenege qarsy dezınfektsııalyq óńdeý jumystary bastaldy

ALMATY. QazAqparat – Almatyda búgin kenege qarsy dezınfektsııalyq óndeý jumystary bastaldy. Bul týraly Almaty qalasynyń sanıtarııalyq-epıdemıologııalyq baqylaý departamentinen málim etti, dep habarlaıdy QazAqparat tilshisi.

Almatyda ormandy alqap pen qala saıabaqtarynda, skverlerinde kenelerge qarsy dezınfektsııalyq óńdeý jumystarynyń 1 kezeńi bastaldy. Jalpy óńdeletin aýmaq 2424,54 gektar.

Qalalyq sanıtarııalyq-epıdemıologııalyq baqylaý departamentinen habarlaǵandaı, dezınfektsııalyq óńdeý jumystarmen 8 ormandy alqap (kólemi - 1904,924 ga) jáne 144 qala saıabaqtary, skverler (kólemi – 519,616 ga) qamtylady jáne aýa-raıyna baılanysty (qurǵaq, jaýyn-shashynsyz kúnderi) kestege sáıkes 5 sáýir - 5 mamyr aralyǵynda júrgiziledi. Kene entsefalıtine qarsy kúrestiń nátıjesi sapaly bolýy úshin óńdeý jumysy eki kezeńde júrgiziledi. Ekinshi kezeń: mamyr, maýsym aılarynda ótedi.

Dezınfektsııalyq is-sharany qalalyq sanıtarııalyq-epıdemıologııalyq baqylaý qyzmetiniń baqylaýymen «Almaty qalasynyń dezınfektsııa ortalyǵy» fılıaly júrgizedi.

Dezınfektsııalyq brıgadalar qajetti quraldarmen, kóliktermen jáne jeke bas qorǵanysh zattarymen qamtamasyz etilgen. Kene entsefalıtine qarsy dezınfektsııalyq óńdeý jumystaryn júrgizý úshin «Favorıt» akarıtsıdtik preparaty qoldanylady. Preparat az ýytty jáne qaýipti emes (3-4 klass). Kenelermen kúresý úshin qoldanylatyn dozalar az jáne adamdar men janýarlar úshin qaýipsiz bolyp tabylady. Óńdeý jumystary tańǵy ýaqytta júrgiziledi.

Óńdeletin aýmaqtardyń shekaralarynda «Kenege qarsy óńdeý júrgizilýde» degen eskertý habarlamalary bar taqtalar ornatylady.

«Qala turǵyndary tómende kórsetilgen saqtyq sharalaryn saqtaýy qajet:

- akarıtsıdty preparattyń eritindisin denege nemese kıimge tıgizip almas úshin, kenege qarsy dezınsektsııalyq óńdeý jumystary júrgizilgen jerlerden qashyqtaý júrý kerek;

- jerdegi shashyratqan preparat kepkenge deıin úı janýarlaryn óńdeý jumystary júrgizilgen jerlerge jibermeý kerek;

- óńdeý jumystary júrizilgen jerlerden 40 kún boıy sańyraýqulaq, shóp nemese jıdekterdi jınaýǵa jáne paıdalanýǵa bolmaıdy;

- turǵyndar men qonaqtarǵa qala saıabaqtary men skverlerge, tabıǵı oshaqtarǵa kenelerge qarsy óńdeý júrgizýde jáne odan keıin 3 kúnde barmaý kerek», - dep eskertti departamentte.