Almatyda qazan aıynda KVI juqtyrýshylar sany tómendeýi múmkin - Ásel Qalyqova
«Almatydaǵy qazirgi jaǵdaı pessımıstik boljamǵa sáıkes keledi. Mysaly, sońǵy táýlikte koronavırýs ınfektsııasyn juqtyrǵan 426 jaǵdaı tirkeldi. Al epıdemıologııalyq jaǵdaıdy baǵalaý matrıtsasynda qala «qyzyl aımaqta» tur. Sondyqtan áli bosańsýǵa bolmaıdy ári vaktsınatsııany kúsheıtý kerek»,- dedi ol.
Onyń aıtýynsha, «COVID–19 qozdyrǵyshynyń «Delta« patogendiliginiń tómendeý úrdisi baıqaldy. Buǵan «sımptomdyq« naýqastardyń úles salmaǵynyń qyrkúıektiń basyndaǵy 96%-dan 27 qyrkúıekke 92%-ǵa deıin tómendeýi dálel. Qazan aıynda KVI juqtyrýshylardyń sany táýligine 40-tan 100-ge deıingi aralyqty kórsetip, osylaısha tómendeýi múmkin dep boljanyp otyr.
«Bul rette shahardaǵy qazirgi epıdemıologııalyq jaǵdaı boıynsha qala turǵyndarynyń ımmýndyq deńgeıi 50%-ǵa jetti. Resmı málimet boıynsha halyqtyń 43%-y vaktsınanyń ekinshi komponentin alsa, 7%-y jyl basynan beri saýyǵyp ketkender»,- dedi spıker.
Ásel Qalyqova almatylyqtarǵa bosańsýǵa bolmaıtynyn atap ótti. Óıtkeni qaýip tolyǵymen seıilgen joq. Koronavırýstyń jańa nusqalary taralýda.
«COVID-19 aýrýynyń platoǵa jetýi pandemııa aıaqtaldy degendi bildirmeıdi. Búginde ınfektsııalyq protsesti toqtatýdyń eń tikeleı ári jyldam tásili – tek vaktsınatsııa», – dep sózin qorytyndylady.
Aıta keteıik, ótken táýlikte Almatyda 2324 adamǵa birinshi komponent, 4636 adam ekinshi komponentke egildi.
Barlyǵy 2021 jyldyń 1 aqpan - 28 qyrkúıek aralyǵynda 948 526 adam birinshi komponentti, 851 423 adam ekinshi komponentti aldy.
Vaktsınalanǵan 60 jastan asqan adamdar sany 117 969 adamǵa jetti.
Eske salsaq, qalada medıtsınalyq uıymdarda, mektep, mádenıet jáne sport nysandarynda, bazar men saýda oıyn-saýyq ortalyqtarynda 160 ekpe pýnkti jumys istep tur.