Almatyda Qazaqstannyń ulttyq toptasýynyń máseleleri men keleshegi talqylandy
Bul sharany QR Bilim jáne ǵylym mınıstrliginiń Fılosofııa, saıasattaný jáne dintaný ınstıtýty uıymdastyrdy. Ultaralyq qatynastar salasyndaǵy jetekshi mamandar qatysqan bul jıynda ulttyq jáne memlekettik qurylys, jańa qazaqstandyq patrıotızm - 2050 jylǵa deıingi ulttyń damý ıdeologııasy, Qazaqstandaǵy ulttyq biregeıliktiń qalyptasýy men qurylýy, mýltımádenı, mýltıetnıkalyq qoǵamnyń ulttyq ıntegratsııa máseleleri, ulttyń tól mádenıeti men genetıkalyq kodynyń saqtalýy (til, salt-dástúr, tarıh, rámizder) jáne basqa da ózekti taqyryptar qaraldy.
Uıymdastyrý komıtetiniń tóraǵasy, fılosofııa ǵylymdarynyń doktory Muhtarbek Shaıkemelevtiń aıtýynsha, qazirgi qazaqstandyq qoǵamnyń áleýmettik-saıası ómirinde jáne kópshilik sanasynda ult máselesi mańyzdy taqyryptardyń qataryna enedi. Osyǵan joǵarydaǵy máseleler boıynsha shyǵyp jatqan kóptegen kitaptar, gazet jáne jýrnal maqalalary, radıo jáne teledıdar habarlary men baǵdarlamalary, ınternet jarııalanymdary dálel bola alady. Qazaqstan qoǵamy ómirinde 1980 jyldardyń ekinshi jartysynan beri qaraı ártúrli pikirtalastar týdyrǵan jalpy ulttyq ıdeıa, ulttyq biregeılik, ultaralyq qarym-qatynas, qazaq jáne orys tilderiniń mártebesi jáne olardyń ózara baılanysy, etnos jáne ult, ultshyldyq, memlekettik ulttyq saıasat, patrıotızm máseleleri mamandardyń qyzyǵýshylyǵyn týdyryp otyr.