Almatyda «Qazaqstan ulttary birligi» festıvali ótti
Qazaqstandyqtar mamyrdyń biri kúni «Qazaqstan ulttarynyń birligi» kúnin toılaıdy. Bul - ártúrli ulttar arasyndaǵy dostastyq, kelisim men úılesimdilik meıramy.
Qazaqstanda ómir súretin ulttardyń dostastyǵyn nyǵaıtý maqsatynda uıymdastyrylyp otyrǵan búgingi festıvalge dıaspora sanyna oraı eń iri on ult ókili saıysqa tústi. Almaty qalasyndaǵy MEGA Park saýda oıyn-saýyq ortalyǵynda uıymdastyrylǵan festıval baıqaýynyń birinshi bóliminde qatysýshylar óz ultynyń dástúri men mádenıetin tanystyrdy. Sondaı-aq, dástúrli án men bı kórermenderge usynyldy. Al baıqaýdyń ekinshi bóliminde tóreshilermen qatar kórermender de ár ulttyń dástúrli taǵamdarynan dám tatyp, qolóner zattarynyń kórmesin tamashalady.
«Almaty qalasy Jastar saıasatyn damytý memlekettik qorynyń qoldaýymen qazirgi tańda alyp qalamyzda balalar men jasóspirimderge arnalǵan 42 oıyn-saýyq uıymdary jumys isteıdi. Osy uıymdar birigip, búgingi fetıvaldi joǵary deńgeıde ótýine atsalysty», - deıdi Qor dırektory ári festıval uıymdastyrýshysy Alma Aýǵanbaeva.
Onyń aıtýynsha, Qazaqstan ulttarynyń birligi kúnine oraı osyndaı festıvalderdiń kóptep uıymdastyrylýy dostastyqtyń odan ári nyǵaıýyna septigin tıgizedi.
Festıval sońynda tóreshiler kórermenderdiń baǵalaýyn eskere otyryp, jeńimpazdardy anyqtady. Dástúrli bı men qolóner ónimderiniń kórmesi arqyly erekshe kózge túsken ýkraın ultynyń ókilderi jeńimpaz atandy. Al ekinshi oryndy káris ultynyń ókilderi jeńip alsa, úshinshi oryn ózbek aǵaıyndardyń qanjyǵasyna baılandy.
Festıvalge qatysqan túrik, ázerbaıjan, orys, grek, tatar, nemis, grýzın dıasporalarynyń ókilderi maqtaý qaǵazdary men arnaıy daıyndalǵan syılyqtarǵa ıe boldy.
Joldas Órisbaev