Almatyda Qazaqstan halqynyń birligi kúnine arnalǵan kórme ótip jatyr

ALMATY. QazAqparat - Almaty qalasy ortalyqtandyrylǵan kitaphana júıesiniń №14 bólimshesinde «1 mamyr - Qazaqstan halqynyń birligi kúnine» oraı «Halyqtar dostyǵy-bizdiń maqtanyshymyz» taqyrybymen fotokórme uıymdastyryldy, dep habarlaıdy QazAqparat tilshisi.

Kitaphanashy Ǵaısha Sahıevanyń aıtýynsha, atalǵan kitaphanada jyl saıyn 1 mamyrda fotokórme uıymdastyrý dástúrge aınalǵan.

«1995 jyly qabyldanǵan, osy ataýly merekeniń Qazaqstan halqy úshin mańyzy zor. Sebebi, ulttar arasyndaǵy yntymaqtastyq, tatýlyq, aýyzbirshilik, beıbitshilik kepili bola alady. Buryn búkil álemdik «Eńbekshiler kúni» bolyp toılanatyn mereke, qazir «Qazaqstan halqynyń birligi» kúni bolyp atalyp ótedi. Óıtkeni, halqymyz yntymaqtastyqqa, dostyqqa erekshe mán bergen»,- deıdi ol.

Kórme, Qazaqstanda turatyn ár ulttyń tatýlyǵyn, birligin beıneleıtin, túrli-tústi sýrettermen bezendirilgen.

« Bizdiń maqsat- elimizdegi túrli ult ókilderi arasyndaǵy tatýlyq pen birlikti nyǵaıtýǵa atsalysý»,- deıdi Ǵaısha Sahıeva.