Almatyda qatty jelden kópqabatty úıdiń qasbeti opyrylyp tústi

ALMATY. QazAqparat – Almatyda daýyl saldarynan «Nurkent» shaǵynaýdanynda ornalasqan kópqabatty úıdiń qasbetiniń syrtqy qaptamasy qulady, dep habarlaıdy QazAqparat tilshisi.

«Búgin keshki saǵat 17:30 shamasynda qatty jeldiń saldarynan Alataý aýdany «Nurkent» shaǵynaýdanyndaǵy №74 úı qasbetiniń bir bóligi qulady. Bul úıdi «Artemıda LTD» JShS 2017 jyly paıdalanýǵa bergen. Qazirgi ýaqytta Alataý aýdany kommýnaldyq qyzmetteriniń kúshimen aýmaqty jınaý jumysy júrip jatyr. Sonymen qatar basqarýshy kompanııa jáne qurylys salýshy («Artemıda LTD» JShS) tarapynan qalpyna keltirý jumystaryn iske asyrý qarastyrylyp jatyr»,- dep habarlady Alataý aýdany ákimdiginen.

Ákimdiktiń aıtýynsha, páterlerdiń, turǵyn emes úı-jaılardyń ıeleri kondomınıým obektisiniń ortaq múlkin (qasbetin) kútip-ustaý jáne onyń qaýipsiz paıdalanylýyn qamtamasyz etý, sonyń ishinde kondomınıým obektisiniń ortaq múlkine aǵymdaǵy jáne kúrdeli jóndeýdi óz qarajaty esebinen qamtamasyz etýge mindetti.