Almatyda kásipkerlerden aqsha talap etken alaıaqtar ustaldy

ALMATY. QazAqparat- Almaty qalasy prokýratýrasynyń bıznes quqyǵyn qorǵaý jónindegi mobıldi toby kásipkerlerden aqsha talap etken alaıaqtardy anyqtady, dep habarlaıdy QazAqparat tilshisi.

Vedomstva málimetinshe, «Nur-SultanProm bezopasnost» JShS qyzmetkerleri ózderin TJ organdarynyń mamandary retinde tanystyryp, bıznes sýbektilerine aıyppul salamyz dep qorqytqan. Kásipkerlerdi órtke qarsy qaýipsizdik qyzmetteri úshin 60 myń teńgege deıin tóleýge májbúr etken.

«Mundaı qylmystyq shema júıeli boldy. Tek qazirgi ýaqytta Almatynyń Naýryzbaı jáne Áýezov aýdandarynda zardap shekken 30-dan astam kásipker anyqtaldy. Mundaı zańsyz is-áreketter bızneske qysymdy tómendetý boıynsha júrgizilip jatqan memlekettik sharalardyń bedelin túsiredi jáne olarǵa nuqsan keltiredi»,- dep habarlady Almaty qalalyq prokýratýradan.

Esterińizge salaıyq, elimizde 2023 jylǵa deıin ShOB sýbektilerin tekserýge moratorıı jarııalandy.

Atalǵan faktiler boıynsha Naýryzbaı aýdanynyń prokýratýrasy qylmystyq isti qozǵaýǵa bastamashylyq etti, nátıjesinde alaıaqtyq jasady degen kúdikpen 1991 jáne 1995 jyly týǵan eki azamat ustaldy, olar sottyń sanktsııasymen qamaýǵa alyndy.

Sonymen birge 2021 jyly prokýratýranyń mobıldi tobyna kásipkerlerden 218 aryz kelip tústi, olar boıynsha prokýrorlyq qadaǵalaýdyń 8 aktisi engizildi, 1,5 myńnan astam quqyq qorǵaldy, 39 tulǵa tártiptik jaýapqa, 26 tulǵa ákimshilik jaýapqa tartyldy, 120 zańsyz tekserý joıyldy.