Almatyda qarjynyń joqtyǵynan 25-ke jýyq áskerı patrıottar klýbynyń tek 8-i ǵana jumys istep tur
Bul týraly óńirlik kommýnıkatsııalar qyzmeti alańynda «Kırov» áskerı-patrıottyq klýbynyń jetekshisi Baqytjan Perimbet aıtty, dep habarlaıdy QazAqparat tilshisi.
Baqytjan Perimbettiń aıtýynsha, áskerı-patrıottyq klýbtar Almaty qalasynyń aýdandarynda jumys isteıdi, onda balalar tegin oqı alady.
«Búginde áskerı-patrıottyq klýbta 150-den astam tárbıelenýshiler bar, olardyń kópshiligi tolyq emes otbasynan shyqqandar, jetim balalar da bar. Negizi qalada bizden bólek, basqa da klýbtar bar. Mysaly, desantshylar, jas shekarashylar, teńizshiler klýby bar. Bizdiń klýb «Teńiz floty» dep atalady. Sondaı-aq bizde jas shekarashylar vzvodtary, jas matrostar, desantshylar vzvodtary bar. Biz respýblıkalyq «Jas sarbaz» qozǵalysymen birge jumys isteımiz. Úıirmemizge 7-18 jas aralyǵyndaǵy balalardy qabyldaımyz», – dedi spıker.
Áskerı-patrıottyq klýbtyń túlekteri (20%) 9-synyptan keıin «Arystan kadet synybyna nemese B.Momyshuly atyndaǵy «Jas ulan» mektebine túsedi. 11-synyptan keıin (5%) QR UQK Shekara akademııasyna, Áskerı baılanys ınstıtýtyna nemese Qurlyq áskerleriniń Áskerı ınstıtýtyna túsedi.
«Bıyl bizdiń klýbtan 25 jas túlek shyqqaly otyr. Olardyń árqaısysy bolashaq mamandyǵyn Qazaqstan Respýblıkasynyń Qarýly Kúshterimen baılanystyrady», - dedi klýb jetekshisi.
Baqytjan Perimbettiń oıynsha, áskerı patrıotızm barlyq salaǵa, onyń ishinde týrızmge de qatysty bolýy kerek.
«Jas sarbazdardyń dene tárbıesi men patrıottyq tárbıesinde taý týrızmi de úlken ról atqarady. «Shyǵys» shekara qyzmeti men QR Ulttyq qaýipsizdik komıtetiniń shekara akademııasymen birlese jasalǵan memorandýmymyz bar. Úlken Almaty kólinde Ozernoe shekara zastavasy ornalasqan. Onda akademııanyń oqytýshylary jazǵy demalysta jas áskerlermen jumys isteıdi, olarǵa taýda júrý daıyndyǵyn, shópti, muzdy betkeılerde júrýdi, radıobaılanysty, zardap shekkenderdi baǵdarlaý jáne evakýatsııalaýdy úıretedi», - dedi B. Perimbet.
Foto: departament po delam oborony goroda Almaty