Almatyda qarjy pıramıdasyn qurǵan úsh boıjetken men bir jigit ustaldy
Vedomstvo málimetinshe, Olar- Qytaı Halyq Respýblıkasynyń tórt týmasy, olardyń ekeýi «qandas» mártebesimen Qazaqstan azamattyǵyn alǵan, taǵy ekeýiniń Qazaqstan Respýblıkasynda turýǵa yqtııarhaty bar.
Kúdiktiler qamaýǵa alyndy. Basty tulǵa – 26 jastaǵy D. esimdi áıel ýaqytsha ustaý ızolıatorynada. Toptyń basqa músheleriniń qylmysqa qatysy men róli tergeý barysynda anyqtalatyn bolady.
«Kúdiktiler kelesideı jospar boıynsha áreket etti: «Lazada grýpp» kompanııasynyń atynan áreket ete otyryp, olar ınternette kapıtaldy ulǵaıtý múmkindigi týraly habarlandyrý jarııalady jáne azamattarǵa krıptovalıýtaǵa salym salýdy usyndy. Mıllıondaǵan teńge salǵandar bar. Shyn máninde, «kásipti» uıymdastyrýshylar dıvıdendterdi tóleýdi oılamaǵan da, olar bastapqydan-aq halyqty aldaýdy maqsat etken. Zardap shekkender aýdandyq polıtsııa basqarmalaryna júgine bastady», – deıdi Almaty qalalyq Polıtsııa departamenti bastyǵynyń orynbasary Dıdar Ahanov.
Kúdiktilerdi qalanyń krımınaldyq polıtsııasynyń, sondaı-aq Naýryzbaı jáne Almaly aýdandyq polıtsııa basqarmalarynyń qyzmetkerleri Aqkent shaǵyn aýdanyndaǵy páterlerdiń birinde ustady.
«Másele úsh qyz ben bir jas jigit týraly bolyp otyr. Toptyń eń úlken múshesi – 26-da, aldyn ala málimet boıynsha, ol jetekshi, eń jasy nebári 20-da.
– Jedel-tergeý toby kúdiktilerdiń úılerin tekserý barysynda ártúrli adamnyń atyna ashylǵan 60-tan astam bank kartasyn, tórt uıaly telefondy, sim-karta men noýtbýktardy tárkiledi. Mańyzdy detal: jalǵa alynǵan páterden banktik karta shottary men qupııa sózderi bar bes dápter de tabyldy»,- deıdi ol.
Polıtsııa ókiliniń aıtýynsha, qazirgi ýaqytta birqatar qylmysqa qatysy bar basqa da adamdardy anyqtaý jáne ustaýǵa baǵyttalǵan keshendi jedel-izdestirý is-sharalary júrgizilip jatyr.