Almatyda qarý-jaraq dúkenine shabýyl jasaǵandardyń sybaılastary Qapshaǵaıda ustaldy

NUR-SULTAN. QazAqparat – Qapshaǵaı qalasynda qańtardaǵy tártipsizdikter kezinde Almatyda qarý-jaraq dúkenine shabýyl jasaǵandardyń sybaılastary ustaldy. Bul týraly QR ІІM Kóliktegi polıtsııa deparamentiniń bastyǵy Ońal Bekeev málim etti, dep habarlaıdy QazAqparat tilshisi.

Onyń aıtýynsha, kólik polıtseıleri Qapshaǵaıdaǵy jaldamaly páterlerdiń birinde Almaty oblysynyń eki turǵynyn anyqtap, qolǵa túsirgen.

Bul eki turǵyn Almaty qalasyndaǵy jappaı tártipsizdik kezinde qarý-jaraq dúkenine shabýyl jasap, 18 atys qarýyn urlady degen kúdikke ilindi. Qazirgi ýaqytta urlanǵan qarýlar tárkilendi.

«Buǵan deıin kólik polıtseıleri olardyń 32 jastaǵy seriktesin ustaǵan bolatyn. Atalǵan azamattarǵa qatysty tergeý soty kúzetpen ustaý túrindegi bultartpaý sharasyn sanktsııalady», dedi O.Bekeev.

Eske sala keteıik, budan buryn Batys Qazaqstanda avtokólikten granata tabylǵanyn jazǵan bolatynbyz.