Almatyda kartop baǵasy qymbattady

ALMATY. QazAqparat - Almatyda kartop qymbattap ketti. Onyń sebebin qalalyq kásipkerlik jáne ınvestıtsııalar basqarmasy túsindirdi, dep habarlaıdy QazAqparat tilshisi.

Qala turǵyndarynyń aıtýynsha, eń qymbat kartop Almatyda, onyń baǵasy 250 teńge.

Almaty qalalyq ákimdiktiń málimetinshe, megapolıs turǵyndary shamamen jyl saıyn 200 myń tonna kartop tutynady. Atalǵan kókónis qalaǵa negizinen Pavlodar, Almaty, Qaraǵandy oblystarynan jetkiziledi.

«Jyl saıyn, maýsymaralyq kezeńde byltyrǵy eginniń kólemi men sapasynyń tómendeýine baılanysty ónimniń qysqa merzimdi jetispeýshiligi baıqalady. Jańa ónim kóp bolmaıdy. Sondyqtan naryqtyq suranysty tolyq jaba almaıdy. Osy kezeńde kókónis Ózbekstan, Qyrǵyzstan, Tájikstan, Pákistan jáne Mysyrdan ımporttalady, olardyń quny logıstıka men valıýta baǵamdaryn eskere otyryp anyqtalady», - dep túsindirdi basqarmadan.

Basqarma ımporttyq ónimder naryqta qysqa merzimde bolatyndyǵyn atap ótti. Olardyń ornyn jaqyn arada Túrkistan óńiriniń kókónisi almastyrady.