Almatyda karantın talabyn buzǵan 35 mekeme anyqtaldy

ALMATY. QazAqparat - Almatynyń monıtorıng toby eki kúnde karantın talaptaryn buzýdyń 35 jaǵdaıyn anyqtady, dep habarlaıdy QazAqparat tilshisi.

Monıtorıng tobynyń málimetinshe, eki kún ishinde 35-ke jýyq karantın shekteýiniń saqtalmaǵany anyqtaldy. Tekserýshiler túngi saǵat 22.00-den keıin jumys isteıtin birneshe meıramhana men karaokeni tirkedi.

Qalada kúnine 15 zań buzýshylyq anyqtalady. Mysaly, 19 tamyzda, saǵat 22.14 shamasynda Almaly aýdanynyń Ómirzaqov kóshesindegi «Premer-holl» banket zalynan 40-qa jýyq kelýshi shyǵaryldy. Mekeme ıesin ákimshilik jaýapqa tartý úshin aýdandyq sanıtarlyq-epıdemıologııalyq baqylaý basqarmasyna materıaldar berildi.

21 tamyzda birqatar zań buzýshylyq anyqtaldy. Medeý aýdanynyń tekserýshileri saǵat 01.34 shamasynda Dostyq dańǵyly boıyndaǵy «Barıton» karaokesy jumys istegenin, onda 40 adamnyń bolǵanyn anyqtady.

Bostandyq aýdanyndaǵy «Forsaj» kafesi de tártip buzýshylardyń tiziminde. 18 tamyzda, shamamen 22.24 saǵatta mekeme karantındik shekteýlerge qaramastan jumys istedi jáne kelýshilerdi qabyldady.

Eske salsaq, Almatyda tamyzda koronavırýs aýrýy órshı tústi. Dert juqtyrý táýligine 1 500-1 600 jańa jaǵdaıǵa jetti. Osyǵan baılanysty megapolıste 1 qyrkúıekke deıin karantın rejımi epıdemıologııalyq jaǵdaıdyń «qoıý qyzyl» aımaǵyna sáıkes uzartyldy.

Sanıtarlyq-epıdemıologııalyq baqylaý departamenti qoǵamdyq tamaqtaný oryndarynyń túngi jumysyna tyıym saldy.

20 naýryzdan bastap qazirgi ýaqytqa deıin barlyǵy 2 myńdaı karantın shekteýin buzý faktisi anyqtaldy. Polıtsııa bólimshelerine 3 300-den astam adam jetkizildi.