Almatyda qar kóshkini bolǵan kezde taýda qalyp qoıǵan týrıster qutqaryldy
Baspasóz qyzmetiniń málimetterine qaraǵanda, 2023 jylǵy 1 sáýirde saǵat 16:35-te TJM Respýblıkalyq jedel-qutqarý jasaǵynyń kezekshi-dıspetcherlik bólimshesine Almaty qalasy TJD jedel kezekshisinen shaqyrý kelip túsken.
Úsh adam Býtakov asýynan Býkreev shyńyna kóterilip bara jatqan ýaqytta qar kóshkini túsip, bir týrıst tómenge qaraı syrǵyp túsken. Osyǵan baılanysty bes adamnan turatyn Respýblıkalyq jedel-qutqarý jasaǵynyń qutqarý toby kómekke attandy. Sonymen qatar, adamdardy izdeýge Almaty qalasynyń Qutqarý qyzmetiniń qutqarýshylary qosymsha jiberildi.
Respýblıkalyq jedel-qutqarý jasaǵynyń kezekshisi oqıǵa ornynyń lokatsııasyn jibergen ótinish berýshimen baılanysqa shyqty. Ol týrıstik marshrýt boıynsha taýǵa kóterilý kezinde qar kóshkini saldarynan ol joldastarynan qalyp qoıǵan.
Ol eshqaıda júrmeı qutqarýshylardyń kómegin kútken. Týrıstermen uıaly baılanys arqyly baılanysqa shyqqan Respýblıkalyq jedel-qutqarý jasaǵynyń qutqarýshylary saǵat 18.43-te zardap shekkendermen vızýaldy baılanys ornatqan.
20 mınýttan keıin RJQJ qutqarý toby týrısterge jetip, zardap shekkenderdi tómenge túsirý jumystaryn bastady. Saǵat 19:55-te týrısterdi tómen túsirý jumystary aıaqtaldy, qutqarýshylar olardy Býtakov shatqalyndaǵy avtoturaqqa deıin jetkizdi. Adamdarǵa medıtsınalyq kómek qajet bolmady.
TJM qutqarýshylary taýda qalǵan týrısterge barlyq qaýipsizdik sharalaryn saqtaýǵa keńes beredi. Taýǵa shyqqan kezde sizge qajet: dene daıarlyǵyn esepteńiz, qutqarý qyzmetteriniń usynystaryn eskerińiz: aýa-raıy jaǵdaılary, kóshkin qaýpi deńgeıi, taýdaǵy serýenge ózińizge qajetti zattarmen qamtamasyz etińiz: paýerbank, sý ótkizbeıtin pakettegi sirińke, sý, qosymsha jyly kıim-keshek, GPS navıgatory.
«Eger sizge kómek qajet bolsa, 112 nemese 8(727) 372-15-60 (TJM Respýblıkalyq jedel-qutqarý jasaǵynyń kezekshi-dıspetcherlik bólimshesi) qońyraý shalyńyz»,-delingen habarlamada.