Almatyda qańtarda qarý urlaǵandar onyń bir bóligin satyp, qalǵanyn jasyryp qoıǵan

ALMATY. QazAqparat- Qańtar oqıǵasynda qarý-jaraq dúkenderinen urlanǵan 13 qarý Almatydaǵy úsh arnaıy is-shara kezinde tárkilendi, dep habarlaıdy QazAqparat tilshisi.

Almaty qalalyq polıtsııa departamentiniń málimetinshe, arnaıy sharany QR ІІM krımınaldyq polıtsııa departamenti ókiliniń basshylyǵymen krımınaldyq polıtsııa basqarmasynyń arnaıy tobynyń qyzmetkerleri júrgizgen.

Polıtsııanyń arnaıy jasaqtary osy jyldyń qańtar aıynda qarý-jaraq dúkenderin tonaýǵa qatysqan alty kúdiktini ustady.

«Kúdiktiler qarýdyń bir bóligin satyp úlgergen, ekinshi bóligin jasyryp qoıǵan. Qarýdy tyǵyp ketken oryn tabyldy. Olardy qalanyń ártúrli bólikterindegi qańyrap bos jatqan jerlerge jasyrǵan. Qoımalardan optıkalyq kózdeýishter jáne basqa da ańshylyq quraldar tabyldy. Qylmystyq isti Almaty qalalyq PD tergeý basqarmasy tirkedi»,- dep habarlady polıtsııadan.

Tárkilengen qarýǵa saraptama taǵaıyndaldy.