Almatyda qańtar oqıǵasynda kúdikti retinde qamaýǵa alynǵandar jaqyndarymen júzdesti

ALMATY. QazAqparat – Almatyda qańtardaǵy jappaı tártipsizdik kezinde tergeý ızolıatoryna 500-ge jýyq kúdikti jetkizilgen, dep habarlaıdy QazAqparat tilshisi.

Almaty qalalyq polıtsııa departamentinde málim etkendeı, qamalǵandardyń arasynda kámelettik jasqa tolmaǵan tórt bala da bolǵan, qazir onyń ekeýi shyǵaryldy. Qamalǵandardyń jartysy eshqaıda ketpeý týraly qolhatpen bosatyldy. Qazir qańtar oqıǵasy kezinde tártipsizdikterge qatysqan 250 adam qamaýda otyr. Tergeý qamaýyndaǵylardyń kóbisi turmystyq tehnıka urlaǵandar men maroderlikpen aınalysqandar.

«Tutqyndardyń jaqyndarymen kezdesýi Almaty qalalyq prokýratýrasymen birlese otyryp júzege asyryldy. Jalǵan aqparattarǵa jol bermeý úshin Adam quqyǵyn qorǵaý jónindegi ýákil, prokýratýra, májilis depýtattary únemi tekseris júrgizip otyrady. Qamaýdaǵylardyń keıbireýi týystarymen nemese qorǵaýshylarymen ekinshi ret kezdesse, keıbireýleri alǵash ret júzdesip otyr. Kúdiktilerge aptasyna eki ret kezdesýge ruqsat etilgen», – dedi LA-155/18 mekemesiniń bastyǵy Áset Jumadıev.

Sondaı-aq, polıtsııada kezdesýge kelgender qamaýdaǵy týystarynyń tamaqtaný jáne ustaý jaǵdaıyn surap, qanaǵattanarlyq jaýap alǵany týraly habarlady.