Almatyda qańtar oqıǵasynan zardap shekken 1 640 kásiporynǵa 16,2 mlrd teńgege shyǵyn óteldi

ALMATY. QazAqparat – Qańtar oqıǵasy kezinde zardap shekken shaǵyn jáne orta bıznes sýbektilerine ótemaqy tóleý aıaqtaldy. Bul týraly máslıhattyń VI sessııasynda Almaty ákiminiń orynbasary Asqar Ámrın aıtty, dep habarlaıdy QazAqparat tilshisi.

Onyń aıtýynsha, zardap shekken 1 640 kásiporynǵa 16,2 mlrd teńgege zalal óteldi, onyń 95% qysqa merzimde tólemder aldy. Barlyq jeke tulǵalarǵa 615,3 mln teńgege múliktik zalal óteldi.

«Qarjynyń bir bóligi «Jańa Alataý» qorynan bólindi – olar 1 294,8 mln teńgege 636 ótinimdi qaıtarýǵa kómektesti. Al bıýdjet qarjysy esebinen 14 899,5 mln teńgege 1 011 ótinim qanaǵattandyryldy»,- deıdi Asqar Ámrın .

Sonymen birge bir jyl ishinde Almaty turǵyndarynyń qaýipsizdigi úshin 2022 jyly qosymsha 16,8 mlrd teńge bólingen. Qarjat Polıtsııa departamentiniń kólik quraldary men 3050 kamerany qalpyna keltirýge jumsalǵan. Bul qarjyǵa sonymen birge aqshalaı ótemaqy tólenip, arnaıy tehnıka, jabdyqtar satyp alynǵan.