Almatyda qańtar oqıǵasynan keıin ustalyp, abaqtyda otyrǵandarǵa depýtattar keldi

ALMATY. QazAqparat - Almaty qalasy boıynsha qylmystyq-atqarý júıesine qarasty tergeý ızolıatoryna QR Parlament Májilisi, Almaty qalasy máslıhatynyń depýtattary, advokattar men ardagerler keldi, dep habarlaıdy QazAqparat tilshisi.

Parlament májilisiniń depýtattary A. Lınnık, A. Qojahmetov, B. Dúısenbınov, G. Bıjanova, V. Nabıev, N. Razzaq, Almaty qalasy máslıhatynyń depýtaty A. Abylkasımova, advokattar J.Saparhanova men N.Jazylbekov tergeý ızolıatorynyń rejımdik korpýstarynda bolyp, kúdiktilerdiń jaı-kúıin kórip shyqty.

Tergeý ızolıatoryna kelgen depýtattar men advokattarǵa Almaty qalasy prokýrorynyń orynbasary N. Aýǵanbaev pen Almaty qalasy boıynsha qylmystyq-atqarý júıesi departamentiniń bastyǵy D. Qanatbekov LA-155/18 mekemeniń (tergeý ızolıatory) qyzmetin uıymdastyrý jáne qańtar oqıǵasy kezinde qamalǵandardy tergep-tekserý tártibi jaıly aqparat berdi.

Májilis depýtattary tergeý ızolıatoryndaǵy tekserýden soń, qańtar oqıǵasyna qatysty ustalǵan 11 kúdiktini jeke qabyldap, ótinishterin tyńdady.

Ustalǵandardy jeke qabyldaý kezinde mekemedegi ustaý jaǵdaıyna, onyń ishinde azaptaýǵa qatysty shaǵymdary bolǵan joq.