Almatyda qant tapshylyǵy joq - ákimdik

ALMATY. QazAqparat - 10 maýsymdaǵy jaǵdaı boıynsha Almaty qalasynda qant tapshylyǵy baıqalmaıdy, dep habarlaıdy QazAqparat tilshisi.

Almaty qalalyq kásipkerlik jáne ınvestıtsııalar basqarmasynyń málimetinshe, saýda nysandary men óndiristik kásiporyndardaǵy qant qory 12 myń tonnadan asady.

«Almatylyqtar aı saıyn 3,3 myń tonna qant tutynady. Megapolıske 30 myń tonnadan astam qant jetkizý josparlanyp otyr. Budan bólek, Almaty oblysyndaǵy «Aqsý qant zaýyty» JShS jáne Jambyl oblysynda ornalasqan «Merki qant zaýyty» kásipornymen 30 myń tonna qantqa kelisimshart jasaldy», - dep jaýap berdi QazAqparat joldaǵan saýalǵa vedomstvodan.

Sonymen qatar, ákimdik qalaǵa qant ýaqytyly jetkizilip jatqanyn atap ótti.

«Qazaqstan temir joly» qant tıelgen vagondardy keshiktirmeı jetkizip otyr. Búgingi tańda Magnum saýda jelisindegi qant qory shamamen 3 myń tonnany quraıdy, ol kún saıyn tolyqtyrylyp otyrady», - dep atap ótti ákimdiktegiler.